၂၈၊ နိုဝင်ဘာ၊ ၂၀၂၃
Zalen
ချင်းပြည်နယ်မြောက်ပိုင်းက ဝင်ထွက်သွားလာမယ့် လမ်းတွေကို လုံခြုံရေးအခြေနေအရ ခတ္တခဏ ပိတ်ထားမယ်လို့ စီးယင်းချင်း ဒေသကာကွယ်ရေးအဖွဲ့ CDF CDM Siyin က နိုဝင်ဘာ ၂၇ရက်နေ့မှာ ထုတ်ပြန်ပါတယ်။
CDF CDM Siyin ရဲ့ထုတ်ပြန်ချက်မှာတော့ လမ်းပိတ်တဲ့အချိန်ကာလကို ရက်စွဲအတိအကျနဲ့ ဖော်ပြထားခြင်းမရှိပေမယ့် လမ်းပြန်ဖွင့်ချိန်ကို ပြန်လည် ထုတ်ပြန်ပေးသွားမယ်လို့ ဆိုပါတယ်။
နိုဝင်ဘာ ၂၆ရက်နေ့ ညပိုင်းမှာ တီးတိန်မြို့နယ်က ကလေး-တီးတိန်လမ်းမဘက်ကို စစ်ကောင်စီတပ်က လက်နက်ကြီးနဲ့ ပစ်ခတ်ခဲ့တာပါတယ်။
ဒါကြောင့် နိုဝင်ဘာ ၂၇ရက်နေ့ မနေ့က ကလေးမြို့ကနေ ချင်းတောင်ကို တက်သွားတဲ့ ကားတွေအားလုံးနီးပါး ကလေးဘက်ကို ပြန်လှည့်လာတယ်လို့ ဒေသခံတွေက ပြောပါတယ်။
“ အခုလောလောဆယ်တော့ ကလေး-တီးတိန်လမ်းတစ်လျှောက် လမ်းသွားလမ်းလာတွေက ရှင်းလင်းနေတာပဲ။ ဘယ်သူမှ သွားတာမရှိဘူး။ အခုဒီဘက်လမ်းလည်း ပိတ်တယ်ဆိုတော့ တီးတိန်- ဖလမ်း-ဟားခါးဘက်ကနေ ပတ်ပြီး ပြည်မဘက်ကို သွားတဲ့ ကားတွေတော့ အခက်အခဲဖြစ်မှာပေါ့။ အခုလောလောဆယ်က ဟားခါးလမ်းဘက်ကပဲ ပတ်ပြီး ကုန်သယ်နေရတာလေ။ ” လို့ ဒေသခံတစ်ဦးက ပြောပါတယ်။
ကလေးမြို့ကိုဆက်သွယ်သွားလာတဲ့ မဟာမြိုင်လမ်း ပိတ်နေတာကြောင့် ကလေးမြို့ကနေ ချင်းပြည်နယ် မြောက်ပိုင်း တီးတိန်- ဖလမ်း- ဟားခါးမြို့ကနေ ပြည်မဘက်ကို သွားကာကုန်စည်တင်ပို့နေရတာ ဖြစ်ပါတယ်။
စစ်ကိုင်းတိုင်း၊ ကလေးမြို့ကနေ ချင်းပြည်နယ် အဝင်လမ်းကို ပိတ်ထားတာကြောင့် ကုန်စည်သယ်ယူရေး အခက်အခဲဖြစ်ပြီး ကုန်စည်ပြတ်လပ်မှာကို ဒေသခံတွေ စိုးရိမ်နေကြပါတယ်။
သတင်း-HeiSok Khai
