၂၀၊အောက်တိုဘာ၊၂၀၂၄
Zalen
ချင်းပြည်နယ်၊မင်းတပ်မြို့အရှေ့ပြင်ရပ်ကွက် ဦး၀မ္မသူးမောင်း ပန်းခြံအနီးအနားရှိ နေရာတွေကို အောက်တိုဘာ ၁၉ ရက်နေ့ မနေ့က ည ၉နာရီခွဲ၀န်းကျင်မှာစစ်ကောင်စီက လေကြောင်းတိုက်ခိုက်မှု နှစ်ကြိမ်ပြုလုပ်ခဲ့တယ်လို့သိရပါတယ်။
အဆိုပါလေကြောင်းတိုက်ခိုက်မှုမှာ စစ်ကောင်စီက ဂျက်ဖိုက်တာ နှစ်စီးနဲ့ ပေါင် ၅၀၀ အားရှိတဲ့ဗုံးသီး ၅ လုံးကျော် ကြဲချကာ တိုက်ခိုက်မှုပြုလုပ်ခဲ့တာလို့သိရပါတယ်။
အဲဒီလေကြောင်းတိုက်ခိုက်မှုကြောင့် ထိခိုက်ပျက်စီးမှုတွေရှိ၊မရှိကို မသိရှိရသလို ဖုန်းလိုင်းပြတ်တောက်ခံရမှုတွေကြောင့် ဆက်သွယ်ရခက်ခဲနေတယ်လို့ ဒေသခံတွေကပြောပါတယ်။
“လေကြောင်းတိုက်ခိုက်တဲ့နေရာကရွာကနေ လှမ်းမြင်ရတယ်၊နေရာတော့အတိအကျမသိဘူး၊ဖုန်းလိုင်းတွေလည်း ပြတ်တာတောက် လျှောက်ပါပဲ၊ထိခိုက်မှုရှိ၊မရှိဆိုတာတော့အသေးစိတ် မပြောတတ်ဘူး၊ထွက်လည်းမကြည့်ရဲဘူး။ ပုန်းနေရတာ” လို့ မင်းတပ်မြို့နယ်ဒေသခံတစ်ဦးက Zalen ကိုပြောပါတယ်။
ပြီးခဲ့တဲ့ အောက်တိုဘာလ ၁၇ ရက်နေ့ကလည်းမင်းတပ်မြို့၊တိုက်နယ်အမှတ် ၄ ဘက်ကိုစစ်ကောင်စီကလေကြောင်းတိုက်ခိုက်ခဲ့လို့ ထိခိုက်မှုတွေ ရှိနေတယ်လို့သိရပါတယ်။
သတင်း – မိုးပီအောင်
