ဖေဖော်ဝါရီလ ၁၃ရက်၊ ၂၀၂၅
Zalen
ချင်းပြည်နယ်တောင်ပိုင်း၊ မတူပီမြို့နယ်၊ ရွာမှန်းကျေးရွာမှာ နယ်မြေပဋိပက္ခကြောင့် ချင်းကာကွယ်ရေးတပ်(လောက်တူ) နဲ့ မရာလဲန်းကာကွယ်ရေးတပ် (MDF) တို့ တိုက်ပွဲပြင်းထန်နေတယ်လို့ ဒေသခံတွေဆီက သိရပါတယ်။
ရွာမှန်းကျေးရွာမှာ ဒီနေ့ ဖေဖော်ဝါရီလ ၁၃ ရက်နေ့၊ မနက် ၈ နာရီအချိန်ကစပြီး MDF နဲ့ CDF-Lautu တို့ နှစ်ဖက်တိုက်ပွဲ ပြန်လည်ပြင်းထန်နေတာဖြစ်ပါတယ်။
“ဒီမနက် တိုက်ပွဲက အတော်လေး ပြင်းထန်နေတဲ့အခြေအနေမျိုးမှာရှိပါတယ်။ နှစ်ဖက်စလုံးက အင်အားတွေ အများကြီးနဲ့တိုက်တာဖြစ်တာကြောင့် အရင်ဖြစ်နေကျ တိုက်ပွဲမျိုးမဟုတ်ဘဲ တကယ့် တိုက်ပွဲကြီးတွေဖြစ်နေတာပါ။” လို့ တိုက်ပွဲအခြေအနေသိရှိသူ ဒေသခံအမျိုးသားတစ်ဦးက ပြောပါတယ်။
CDF-Lautu နဲ့ MDF တို့ဟာ ရွာမှန်းကျေးရွာ နယ်မြေပိုင်ဆိုင်မှု အငြင်းအခုံဖြစ်ကာ ပြီးခဲ့တဲ့ ဇန်နဝါရီလကတည်းက တိုက်ပွဲဖြစ်ပွားခဲ့တာဖြစ်ပါတယ်။
အဲဒီ တိုက်ပွဲတွင်း MDF နဲ့ CDF-Lautu တို့နှစ်ဖက်ရဲဘော်တွေ ထိခိုက်ကျဆုံးမူရှိတယ်လို့ သိရပါတယ်။
ဇန်နဝါရီလ ဖြစ်ပွားတဲ့ တိုက်ပွဲတွင်းက ရွာမှန်းကျေးရွာက ဘုရားကျောင်း၊ စာသင်ကျောင်းနဲ့ အရပ်သားနေအိမ်တွေဟာ လက်နက်ကြီးကျည်နဲ့ ဒရုန်းတို့နဲ့ တိုက်ခိုက်ခံရပါတယ်။
ဒါ့အပြင် တိုက်ပွဲကြောင့် ရွာမှန်း၊ စပေါ်ကျေးရွာနဲ့ အနီးအနားကျေးရွာက ဒေသခံတွေ ရာနဲ့ချီပြီး ဘေးလွတ်ရာကို ထွက်ပြေးတိမ်းရှောင်နေကြရပါတယ်။
CDF Lautu နဲ့ MDF တို့ကြား ဖြစ်ပွားတဲ့တိုက်ပွဲဟာ ချင်းပြည်ကောင်စီပူးပေါင်းတပ်နဲ့ ချင်းညီနောင်ပူးပေါင်းတပ်တို့ကြား ဖြစ်ပွားတဲ့ ပဋိပက္ခအဖြစ် သတ်မှတ်၍ မရကြောင်း ပဋိပက္ခပြေလည်နိုင်ရေး နှစ်ဖက်စလုံးမှာ တာဝန်ရှိတယ်လို့ ဆလိုင်း ပေါလ်က CC တစ်နှစ်ပြည့် သတင်းစာရှင်းလင်းပွဲမှာ ပြောဆိုထားပါတယ်။
CDF-Lautu ဟာ CC အဖွဲ့ဝင်ဖြစ်ပြီး MDF ဟာ ချင်းညီနောင်အဖွဲ့ဝင်ဖြစ်ပါတယ်။
သတင်း – ဆလိုင်း
