ဖေဖော်ဝါရီ ၁၇ ၊ ၂၀၂၆
Zalen
ချင်းပြည်နယ်၊ ပလက်ဝမြို့နယ်၊ ရှင်းလက်ဝကျေးရွာကို ကုန်ပစ္စည်းသွားပို့ရင်း မီဇိုးယာဉ်မောင်းတစ်ဦး သေဆုံးခဲ့ ခြင်းနဲ့ပတ်သက်လို့ နှစ်နိုင်ငံနယ်စပ်ကုန်သွယ်ရေးလမ်းကြောင်းများကို နှစ်လကြာပိတ်သွားမယ်လို့ လောင်တလိုင် ခရိုင်အုပ်ချုပ်ရေးမှူးက အမိန့်ထုတ်ပြန်ထားပါတယ်။
မီဇိုရမ်ပြည်နယ်၊ လောင်တလိုင်မြို့၊ AOC ရပ်ကွက်မှနေထိုင်တဲ့ ဦးလာလ်ရမ်ဆန်းနာ ( Lalramsanga) ဟာ ပြီးခဲ့တဲ့ ဖေဖော်ဝါရီလ ၁၁ ရက်နေ့မှာ ရှင်းလက်ဝကိုကုန်ပစ္စည်းသွားပို့ရာကနေ ပျောက်ဆုံးသွားပြီး ဖေဖော်ဝါရီ လ ၁၅ ရက်မှာ သေဆုံးလျက်ပြန်တွေ့ခဲ့ကြတာဖြစ်ပါတယ်။
ဒီကိစ္စနဲ့ပတ်သက်လို့ လောင်တလိုင်ခရိုင်အုပ်ချုပ်ရေးမှူးက မနေ့ ဖေဖော်ဝါရီလ ၁၆ ရက်နေ့မှာ သတင်းဌာနများနဲ့ တွေ့ဆုံခဲ့ပြီး နယ်စပ်ကုန်သွယ်ရေးလမ်းကိုနှစ်လကြာပိတ်သွားမှာဖြစ်ကြောင်းပြောကြားထားပါတယ်။
ဒီအမှုနဲ့ပတ်သက်လို့ စုံစမ်းစစ်ဆေးမှုအမျိုးမျိုးပြုလုပ်လျက်ရှိကြောင်း၊ ဒီပြစ်မှုကျူးလွန်သူများက နိုင်ငံခြားသား များဖြစ်ရင်လည်း သူတို့နဲ့ထိုက်သင့်တဲ့အပြစ်ပေးနိုင်ဖို့ ကြိုးစားနေကြောင်းပြောကြားထားပါတယ်။
အလားတူ လောင်တလိုင်ခရိုင်ရဲမှူး PC Lalchunglura က ဒီအမှုကိုလူသတ်မှုအဖြစ်အမှုဖွင့်ထားပြီး အမှုမှန်ပေါ် ပေါက်နိုင်ရန် အတက်နိုင်ဆုံးကြိုးစားနေကြောင်း၊ CYLA နဲ့ MTP စတဲ့လူငယ်အဖွဲ့အစည်းများနဲ့လည်း ပူးပေါင်း ဆောင်ရွက်မှု အားကောင်းကောင်းနဲ့လုပ်ဆောင်နေကြောင်းပြောကြားထားပါတယ်။
လက်ရှိမှာ ချင်းပြည်နယ် နဲ့ ရခိုင်ပြည်နယ်ကပြည်သူများဟာ အများအားဖြင့် မီဇိုရမ်ပြည်နယ်၊ လောင်တလိုင် ခရိုင် နဲ့ ရှာဟာ ခရိုင်များမှာ အခြေခံစားသောက်ကုန်များ၊ ဆေးဝါးများနဲ့ စက်သုံးဆီများကို ဝယ်ယူတင်ပို့လျက်ရှိ တာကြောင့် လမ်းပိတ်ဆို့မှုကြာမြင့်လာပါက ကုန်ပစ္စည်းပြတ်လပ်မှု၊ ကုန်စျေးနှုန်းမြင့်တက်မှုများနဲ့ကြုံတွေ့နိုင် ပါတယ်။
သတင်း – Mickey
ဓာတ်ပုံ-လူမှုကွန်ယက်
#မီဇိုး#နယ်စပ်#လမ်းပိတ်#နှစ်လ#Zalen
