HAK/၂၅၊အောက်တိုဘာ၊၂၀၂၃။
Zalen
ကရင်ပြည်နယ်၊ ကော့ကရိတ်မြို့နယ်၊ ဆင်ကုန်းရွာအနီးမှာ ယမန်နေ့ အောက်တိုဘာလ ၂၄ရက်နေ့ မနက်မှာ KNLA ပူးပေါင်းတပ်နဲ့စစ်ကောင်စီတပ်တို့ တိုက်ပွဲဖြစ်ပွါးခဲ့ပြီး စစ်ကောင်စီဘက်က တပ်ရင်းမှူးအပါဝင် ၆ဦးသေဆုံးပြီး ၈ဦး ဒဏ်ရာရထားတယ်လို့ သိရပါတယ်။
တပ်မဟာ(၄၄)လက်အောက်ခံ ခမရ-၂၀၇ စစ်ကောင်စီစစ်ကြောင်းက ကော့ကရိတ်မြို့ကနေ ဆင်ကုန်းကျေးရွာဘက်ကို စစ်ကြောင်းထိုးလာတာကြောင့် ကြားဖြတ်တိုက်ခိုက်တာဖြစ်တယ်လို့ သိရပါတယ်။
တိုက်ပွဲမှာပါဝင်ခဲ့တဲ့ ဒရုန်းတပ်ဖွဲ့ဝင်ရဲဘော်တစ်ဦးက ”မနက် ၅နာရီဝန်းကျင်မှာ စပြီးကိုယ့်ဘက်ကဦးအောင်တိုက်ခိုက်ခဲ့တယ်။ ကျွန်တော်တို့ဘက်က Fixed-Wing မောင်းသူမဲ့ဒရုန်းတွေနဲ့ဗုံးကြဲတိုက်ခိုက်နိုင်လို့ အားသာချက်ရခဲ့တယ်။သူတို့ဘက်က တပ်ရင်းမှူးလည်းသေတယ်။ ကျွန်တို့ပူးပေါင်းတပ်ဖွဲ့ဝင်ဘက်ကတော့ အနည်းငယ်ဒဏ်ရာရတာလောက်ပဲရှိတယ်။ စစ်ကောင်စီက အထိနာတော့ Mi35ရဟတ်ယာဉ်နဲ့ပါပစ်ကူတယ်။ လက်နက်ကြီးတွေနဲ့လည်းပစ်ကူတာတွေရှိတယ်”လို့ပြောပါတယ်။
တိုက်ပွဲအတွင်း စစ်ကောင်စီဘက်က တပ်ရင်းမှူး ဒုဗိုလ်မှူးကြီး ငြိမ်းချမ်းကိုကိုအပါဝင် ၆ဦးသေဆုံးပြီး ၈ယောက်ကျော် ဒဏ်ရာရတယ်လို့ ၎င်းရဲ့ပြောကြားချက်အရ သိရပါတယ်။
တပ်မဟာ (၄၄)လက်အောက်ခံ ခမရ-၂၀၇တပ်ရင်းဟာ KNU တပ်မဟာ၆ နယ်မြေအတွင်းမှာ တပ်ပြေး၊အရာရှိများနဲ့သေဆုံးမှုများတဲ့ တပ်ရင်းဖြစ်တယ်လို့ သိရပါတယ်။
