ကျန်းမာရေးဝန်ထမ်းတွေ သပိတ်မှောက်တဲ့ကြား ရန်ကုန်တိုင်းဒေသကြီး မရမ်းကုန်းမြို့နယ် အင်းယားစင်တာတွင် နေ့စဉ် ကိုဗစ်ကာကွယ်ဆေးထိုးသူ ၇၀၀ မှ ၁၅၀၀ ကြားရှိတယ်လို့ မတ်(၂၅)ရက်ထုတ် ပြည်မြန်မာဂျာနယ်က ဖော်ပြထားပါတယ်။
ရန်ကုန်တွင် အခုလို ကိုဗစ်ကာကွယ်ဆေးထိုးတာဟာ တစ်ပတ်ကျော်ကြာပြီဖြစ်ပြီး နေ့စဉ် နံနက် ၉ နာရီမှ နေ့လည် ၂ နာရီထိ ထိုးနှံလျက်ရှိပါတယ်။
မြန်မာနိုင်ငံတွင် အိန္ဒိယထုတ် ကိုဗစ်ကာကွယ်ဆေး Covishield ဆေးကို ဇန်နဝါရီလ (၂၇)ရက်နေ့တွင် ကျန်းမာရေးဝန်ထမ်းတွေထံပထမဆုံးအကြိမ် စတင်ထိုးနှံခဲ့ပါတယ်။
အခု စစ်တပ်က အာဏာသိမ်းပြီးနောက် ကိုဗစ်ကာကွယ်ဆေး ဆက်လက်ထိုးနှံဖို့ဆောင်ရွက်ပေမယ့် ကျန်းမာရေးဝန်ထမ်းများ CDM ပြုလုပ်ကြတာကြောင့် ကိုဗစ်ကာကွယ်ဆေးကျွမ်းကျင်သူ မလုံလောက်တာကြောင့် နေရာဒေသအများစုတွင် ကာကွယ်ဆေးဆက်လက်မထိုးနိုင်ပဲဖြစ်နေပါတယ်။
ချင်းပြည်နယ်မှာလည်း ကိုဗစ်ကာကွယ်ဆေးကျွမ်းကျင်တဲ့ ကျန်းမာရေးဝန်ထမ်းတွေမရှိတော့တာကြောင့် တပ်မတော်ဆရာဝန်တွေခေါ်ယူပြီး ကာကွယ်ဆေးထိုးဖို့ ပြင်ဆင်နေကြတယ်လို့ ပြည်နယ် ကောင်စီဥက္ကဌထံကနေ သတင်းရရှိပါတယ်။
