စက်တင်ဘာ၊၁၉၊၂၀၂၃
စစ်ကိုင်းတိုင်း၊ ကလေးခရိုင်၊ မင်းကင်းမြို့နယ်၊မေက္ကတော်ရွာအနီး ချင်းတွင်းမြစ်ထဲမှာ ယနေ့စက်တင်ဘာ ၁၉ ရက် မနက်၉နာရီခန့်တွင် မတော်တဆနစ်မြုပ်ပြီး ခရီးသည် ရာချီပျောက်ဆုံးကြောင်း ဒေသခံများဆီက သိရပါတယ်။
ဒေသခံတစ်ဦးက ”လှေနစ်မြုပ်တဲ့ထဲမှာ ကလေးငယ်တွေ၊ဝန်ထမ်းတစ်ချို့၊နိုင်ငံခြားမှာ အလုပ်လုပ်ဖို့သွားတဲ့တချို့ပါတယ်။ အခုထိတော့ လူ ၁၀၀ကျော်ပျောက်ဆုံးနေသေးတယ်”လို့ ပြောပါတယ်။
ခရီးသည်အများစုက ခန္တီးဘက်ကလို့သိရပြီး ကျောက်စိမ်းသယ်တဲ့လှေအုပ်စုနဲ့ လိုက်လာကြတာလို့သိရတယ်။ မနေ့ညက မင်းကင်းအောက်ဖက်မှာ ညအိပ်ကြပြီး ဒီမနက်မှ ယာဉ်ပြန်ထွက်တာလို့သိရပါတယ်။
ဒေသခံရေယာဉ်လုပ်သားတစ်ဦးက “လှေက ကဲ့နက်တောင်ခြေမှာမြုပ်သွားတာ။ အဲဒီနေရာက ရေကြောင်းအပြောင်းလဲ အမြဲရှိလို့ ရေတက်ချိန်၊ ကျချိန်တွေမှာ ဂရုစိုက်မောင်း နေကြရပါတယ်”လို့ဆိုပါတယ်။
ကယ်ဆယ်ရေးအဖွဲ့က ဆက်လက်ရှာဖွေးရေးတွေ လုပ်ဆောင်နေဆဲဖြစ်လို့ သေဆုံး၊ ပျောက်ဆုံးမှုစာရင်းကိုလည်း အတည်မပြုနိုင်သေးပါ။
