၂၀ နိုဝင်ဘာ၊ ၂၀၂၃
Zalen
စင်ကာပူနိုင်ငံရောက် မြန်မာနိုင်ငံသား ကူကီးချင်းလူငယ်များစုရုံးပြီး ကူကီးချင်း ရိုးရာကောက်သစ်စားပွဲနဲ့ ဆုတောင်းပွဲကို နိုဝင်ဘာ၁၉ရက်နေ့မှာ Kuki Worship Service – Singapore (KWS) က ဦးဆောင်ကာစင်ကာနိုင်ငံ Risen Grace Ministries ဘုရားကျောင်းမှာ ကျင်းပပြုလုပ်ခဲ့တယ်လို့ သိရပါတယ်။
နှစ်တစ်နှစ်ရဲ့ အောက်တိုဘာလ ၃၁ရက်နဲ့ နိုဝင်ဘာ ၁ရက်နေ့ တွေမှာ နှစ်စဥ်ကျင်းပလေ့ရှိတဲ့ကူကီးချင်းလူမျိုးစုတွေရဲ့ ရိုးရာနှစ်သစ်ကူးပွဲတော်ဖြစ်တဲ့ Chvang Kut ပွဲတော်ကို ကိုဗစ်ကပ်ရောဂါစတင်ကတည်းက မကျင်းပဖြစ်တော့ဘဲ ယခုနှစ်မှသာ စင်ကာပူနိုင်ငံရောက် ကူကီးချင်းလူငယ်များက စုစည်းပြုလုပ်ခဲ့ကြတာဖြစ်ပါတယ်။
“Chavang Kut ရဲ့အဓိပ္ပာယ်က Chavang ဆိုတာက ဆောင်းရာသီ သီးနှံရိတ်သိမ်းချိန်ကိုဆိုလိုတာပေါ့နော်။ Kut ဆိုတာကျတော့ ပျော်ပျော်ပါးပါးနဲ့ သီးနှံရိတ်သိမ်းကြတာမျိုးပေါ့။ ဟိုးတုန်းကတော့ ကျွန်တော်တို့ ဘိုးဘွားတွေက သီးနှံရိတ်သိမ်းပြီးတော့ အောင်ပွဲခံတဲ့အနေနဲ့ ခေါင်ရည်သောက်ကြ၊ နွားနောက်သားစားကြနဲ့ တစ်နှစ်တာ ပင်ပန်းခဲ့သမျှ အနားယူပြီး ပျော်ပျော်ပါးပါးနဲ့အောင်ပွဲခံကြတာမျိုးပါ။ ဒါက နောက်ပိုင်းမှာရိုးရာပွဲတော်တစ်ခုလိုဖြစ်သွားပြီး နှစ်တိုင်းကျင်းပခဲ့ကြတာပေါ့၊ လက်ရှိ မြန်မာနိုင်ငံအခြေအနေကြောင့် ပျော်ပွဲရွှင်ပွဲပုံစံနဲ့ မလုပ်တော့ဘဲ ရိုးရားအကတွေကကြ၊ ဓမ္မသီချင်းတွေသီဆိုကြ၊ဆုတောင်းဆပ်ကပ်ကြ၊ အချင်းချင်း မိတ်သဟာယဖွဲ့ကြနဲ့ပဲ လူငယ်တွေ စုရုံးပြီးအကျဥ်းချုံးလုပ် ခဲ့ကြတာပါ။” လို့ ပွဲမှာပါဝင်သူ ကူကီးချင်းလူငယ်တစ်ဦးက ပြောပါတယ်။
ဒီပွဲကို မိသားစုစားဝတ်နေရေးအခက်အခဲတွေကြောင့် တစ်ချို့ ပညာရေးတစ်ပိုင်းတစ်စနဲ့စင်ကာပူနိုင်ငံကိုထွက်ခွာ အလုပ်လုပ်ကိုင်လာကြရတဲ့ ကူကီးလူငယ်တွေ၊ နယ်ပယ်အသီးသီးလုပ်ငန်းခွင််အသီးသီးက ကူကီးလူမျိုးတွေရဲ့အာလုံး အဆင်ပြေကြမယ့် တနင်္ဂနွေနေ့ကိုရွေးချယ်ပြီး နိုဝင်ဘာ ၁၉ရက်နေ့ စင်ကာပူနိုင်ငံ Risen Grace Ministries ဘုရားကျောင်းမှာ ပြုလုပ်ကျင်းပခဲ့ကြတာပါ။
“အာဏာမသိမ်းခင်ကတည်းက လည်းစင်ကာပူရောက် ကူကီးလူမျိုးတွေစုပြီးOut door တွေမှာ Game ဆော့ကြတယ်။ပျော်ပျော်ရွှင်ရွှင်နဲ့ဖြတ်သန်းကြတယ်ပေါ့နော်။ဒီနှစ်ကတော့ သိတဲ့အတိုင်း အားလုံးဒုက္ခရောက်နေကြတဲ့အချိန်ဖြစ်နေတာတစ်ကြောင်း၊ပြီးတော့ ကိုဗစ်ကတည်းက မကျင်းပဖြစ်တော့တာကတစ်ကြောင်း၊ တစ်ခြားလူမျိုးစုတွေကလည်း ဆိုင်ရာ ရိုးရာပွဲတွေကို အနည်းအကျဥ်းပြန်လုပ်လာကြတာတစ်ကြောင်း၊ ကိုယ့်လူမျိုုးရဲ့ Identity လည်းတိမ်မြုပ်မသွားအောင် စစ်ဒဏ်ခံဒေသက ကူကီးလူမျိုးစုတွေအတွက်ပါ ငဲ့ညှာသောအားဖြင့်အရင်နှစ်တွေလို ကြီးကြီးကျယ်ကျယ်မဟုတ်တော့ဘဲ အကျဥ်းချုံးလေးနဲ့ လုပ်ဖြစ်ခဲ့ကြပါတယ်” လို့ ကူကီးလူငယ်ခေါင်းဆောင်တစ်ဦးကပြောပါတယ်။
အဲ့ဒီပွဲကို စင်ကာပူရောက် ကူကီးချင်းလူမျိုး ၁၀၀ကျော်တက်ရောက်လာကြပြီး ရိုးရာဝတ်စုံတွေနဲ့ ရိုးရာအကတွေကပြကာ မြန်မာပြည်က စစ်ဘေးရှောင်တွေအတွက် အလှူငွေကောက်ခံခြင်း၊ ဓမ္မတေးများသီဆိုခြင်း၊ မြန်မာပြည်အတွက်အထူးဆုတောင်းခြင်းများပြုလုပ်ခဲ့ကြတယ်လို့ဆိုပါတယ်။
ကူကီးလူမျိုးစုတွေဟာ တမူးမြို့နဲ့တမူးမြို့အထက်ပိုင်း မြန်မာ – အိန္ဒိယ နယ်စပ်က ဒေသတွေနဲ့မြန်မာပြည်အနှံ့ပြားမှာနေထိုင်ကြပြီးမြန်မာပြည်တွင်းမှာတော့ လူဦးရေ ၃သောင်း၃ထောင်ခန့် နေထိုင်နေကြတယ်လို့ ဝီကီပီဒီးယားရဲ့ဖော်ပြချက်အရ သိရပါတယ်။
လက်ရှိမှာတော့ တမူး ခမ်းပါတ် ကလေးဒေသတွေမှာ တိုက်ပွဲတွေပြင်းထန်လာတဲ့အတွက်အိန္ဒိယနိူင်ငံ မဏိပူရ်ပြည်နယ်ဖက်ကိုတိမ်းရှောင်နေကြရတာမှာ မဏိပူရ်အစိုးရရဲ့အဖမ်းဆီးတွေကြောင့် ကူကီးလူမျိုး၅ထောင်ကျော်ဟာတောတောင်တွေထဲ ထွက်ပြေးတိမ်းရှောင်နေရပါတယ်။
သတင်း -ဒေမီယံ
