စက်တင်ဘာ ၂၀၊၂၀၂၃
ကရင်ပြည်နယ်၊ကော့ကရိတ်မြို့နယ်၊ဝေါ်လေအခြေစိုက် စစ်ကောင်စီ တပ်မ(၄၄)လက်အောက်ခံ ခမရ-၅၅၆ တပ်ရင်းမှူး ဝင်းနောင်ထွန်း ဦးဆောင်သော စစ်ကြောင်းမှ စစ်သားနှစ်ဦးသည် စက်တင်ဘာ ၆ ရက်နေ့တွင် KNLA ထံ လာရောက်ပူးပေါင်းခဲ့ကြောင်း ယနေ့စက်တင်ဘာ ၂၀ရက်နေ့တွင် KNU ကသတင်း ထုတ်ပြန်ထားသည်။
အဆိုပါစစ်သား၂ဦးသည် တပ်သား ကိုကိုနိုင်(အသက်၂၀)နှင့် တပ်သား အိုက်လျှန်း(အသက်၂၀) တို့ဖြစ်ပြီး တပ်တွင်းမှ အထက် အရာရှိများ၏ မတရားဖိနှိပ်အုပ်ချုပ်မှုကို မနှစ်သက်တော့သဖြင့် မိမိတို့တပ်မှ ကြိုးစားရုန်းကန် လွတ်လာကြောင်း KNUကရေးသားဖော်ပြထားသည်။
၎င်းတို့၂ဦးအနက် တစ်ဦးက MA-1တစ်လက်၊ ကျည်ဘောက် ၄ခု၊ ၅.၅၆ကပစ ကျည်တောင့် (၂၃၉)တောင့်နှင့် အီကွေးမင့်တစုံ ယူဆောင်လာခဲ့ပြီး တစ်ဦးက ကိုယ်လွတ်ရုန်းထွက်လာသည်ဟု KNUကထုတ်ပြန်ထားသည်။
အထက်ပါလာရောက်ပူးပေါင်းလာသည့်စစ်သား၂ဦးကို ထိုင်းဘတ်ငွေ (၅၀၀၀၀) ထောက်ပံ့ပေးခဲ့ကြောင်း သိရပြီးစစ်ကောက်စီလက်အောက်ခံမှ မည်သည့်စစ်သားမဆို ပြည်သူလူထံ လက်နက်ခံယမ်းနှင့်တကွလာရောက်ပူးပါက ကြိုဆိုလျှက်ရှိကြောင်းနှင့်၎င်းတို့၏ရှေ့ဘဝ ရပ်တည်နိုင်ရေး ကူညီထောက်ပံ့မည်ဖြစ်ကြောင်း KNUကရေးသားဖော်ပြထားသည်။
ပြီးခဲ့သည့် စက်တင်ဘာ ၈ ရက်နေ့ကလည်း ခြေမြန်တပ်ရင်း(၉)မှ တပ်သားတစ်ဦး 388အမျိုးစားစနိုက်ပါတလက်ယူဆောင်လာပြီး KNUထံပူးပေါင်းလာခဲ့ကြောင်းသိရသည်။
