ဇန်နဝါရီ ၂၆ ၊ ၂၀၂၆
Zalen
အိန္ဒိယ-မြန်မာနယ်စပ်၊ ရိဒ်ခေါဒါရ်ကနေ ဇိုခေါထာရ်ဘက်ကို တင်သွင်းလာတဲ့ ကုန်စိမ်းအိတ်များထဲမှ မူးယစ်ဆေး အများအပြားဖမ်းဆီးခဲ့တယ်လို့ သိရပါတယ်။
ဇိုခေါထာရ်ရဲတပ်ဖွဲ့များဟာ ပြီးခဲ့တဲ့သောကြာနေ့တုန်းက နယ်စပ်ဂိတ်ကနေဝင်လာတဲ့ ကုန်စိမ်းအိတ်များကို ရှာဖွေစစ်ဆေးခဲ့ရာ မုန်ညင်းရွက်ထည့်ထားတဲ့ အိတ်ထဲကနေ ဘိန်းဖြူအများအပြားဖမ်းဆီးခဲ့တာ ဖြစ်ပါတယ်။
အဆိုပါ မုန်းညင်းရွက်အိတ် ၃ အိတ်ထဲကနေ ဆပ်ပြာဗူး ၃၉ ဗူး၊ အလေးချိန်အားဖြင့် ၄၆၈ ဂရမ်ရှိတဲ့ ဘိန်းဖြူ များကို ဖမ်းဆီးခဲ့ခြင်းဖြစ်ကာ ယင်းဘိန်းဖြူများက နိုင်ငံတကာပေါက်စျေးဖြင့် ရူပီး ၉,၃၆၀,၀၀၀ တန်ဖိုးရှိတယ်လို့ သိရပါတယ်။
အလားတူ မြန်မာဘက်ကနေ ဝင်လာတဲ့ ကုန်စိမ်းအိတ်များအနက် မျောက်ငိုသီးများထည့်ထားတဲ့ အိတ်ကိုထပ်မံ စစ်ဆေးခဲ့ရာ မက်တမ်ဖက်တမင်း စိတ်ကြွဆေးပြား အလုံးရေ ၉၀,၉၀၀ ကိုထပ်မံဖမ်းဆီးခဲ့တယ်လို့ သိရပါတယ်။
အဆိုပါ စိတ်ကြွဆေးများဟာ အလေးချိန်အားဖြင့် ၁၀.၈၁၈ ကီလိုဂရမ်အလေးချိန်ရှိပြီး ရူပီး သိန်းပေါင်း ၁၄၀ ကျော်တန်ဖိုးရှိတယ်လို့သိရပါတယ်။
ယင်းမူးယစ်ဆေးဝါးများနဲ့ ပတ်သက်ဆက်နွယ်သူကို ယနေ့အချိန်ထိဖမ်းဆီးနိုင်ခြင်းမရှိသေးဘဲ ဆက်လက် စုံစမ်း နေတယ်လို့သိရပါတယ်။
သတင်း – Mickey
ဓာတ်ပုံ-လူမှုကွန်ယက်
#အိန္ဒိယ#မြန်မာ#နယ်စပ်#မူးယစ်ဆေး#Zalen
