၂၀၁၉၊ အောက်တိုဘာ(၁၉)
တိုင်းဒေသကြီးနဲ့ ပြည်နယ် ယူ-၁၂ ဘောလုံးပြိုင်ပွဲ ပထမနေ့တွင် ချင်းက ပဲခူးကို ၆ ဂိုး ၂ ဂိုးနဲ့ အနိုင်ရရှိသွားပါတယ်။
ယင်းပြိုင်ပွဲကို ရန်ကုန်မြို့ အမျိုးသားဘောလုံးအကယ်ဒမီမြက်ခင်းတုကွင်းမှာ ဒီနေ့ညနေ ၄ နာရီတွင်ယှဉ်ပြိုင်ကစားကြပါတယ်။
ချင်းပြည်နယ် ယူ-၁၂ အသင်း နည်းပြ ဆရာကီးလိန်း က“ကျနော်တို့အသင်းထဲက မတူပီကျောင်းအုပ်ကိုယ်တိုင် အသက်အာမခံတယ်ဆိုပြီးလာပို့တဲ့ အမွှာညီအစ်ကို နှစ်ယောက်ကို အကောင်ကြီးတယ် ဘာညာဆိုပြီး တခြားအသင်းတွေ ကန့်ကွက်လို့အဖြုတ်ခံရတယ်။ ကျန်တဲ့ကစားသမားထဲက တစ်ယောက်ဖျားပြီးတော့ တစ်ယောက် အန်ဂယ်နာနေလို့မကစားနိုင်ဘူး။ တစ်ပွဲမှာ လူငါးယောက်လဲရမယ်ဆိုပေမယ့် ဒီနေ့ညတော့ လေးယောက်ပဲလဲလိုက်တယ်။ နောက်ပွဲတွေလည်း အပြိုင်ဆိုင်ကပြင်းထန်လာမယ်ဆိုတော့ စိုးရိမ်တာပေါ့” လို့ပြောပါတယ်။
ချင်းအသင်းတွင် မင်းတပ်မြို့နယ်မှ ကစားသမား ၁၀ ယောက်၊ မတူပီမှ ၆ ယောက်ပါဝင်ကြပါတယ်။ မနှစ်တုန်းက ချင်း ယူ-၁၂ အသင်းဟာ မကွေးတိုင်းနဲ့ ဆီမီးဖိုင်နယ်တွင် ကစားရာ ပယ်နလ်တီနဲ့ ရှုံးနိမ့်လို့ တတိယဆုရရှိခဲ့ကြပါတယ်။
အောက်တိုဘာလ (၂၁)ရက် မနက် (၈)နာရီတွင် ချင်း နဲ့ ရခိုင် ယှဉ်ပြိုင်ကစားမှာဖြစ်ပါတယ်။ အောက်တိုဘာလ (၂၃)ရက် ညနေ ၄ နာရီတွင် ချင်း နဲ့ ရှမ်း(မြောက်) ယှဉ်ပြိုင်ကစားပါမယ်။ ဗိုလ်လုပွဲကို အောက်တိုဘာ (၃၁)ရက်ညနေ (၄)နာရီတွင်ကစားပါမယ်။
