၇၊ နိုဝင်ဘာ၊ ၂၀၂၃
Zalen
ချင်းပြည်နယ်၊ တီးတိန်မြို့နယ်၊ သိုင်းငင်းကျေးရွာမှာ ဒီဇင်ဘာ ၇ရက်နေ့ မနက်ပိုင်းကတည်းက စစ်ကောင်စီတပ်နဲ့ CDF CDM Siyin တို့ တိုက်ပွဲဖြစ်ပွားနေပြီး ကလေးမြို့ကနေ စစ်ကောင်စီတပ်က လက်နက်ကြီးနဲ့ အဆက်မပြတ် ပစ်ကူပေးတယ်လို့ ဒေသခံတွေက ပြောပါတယ်။
“ ဒီနေ့ မနက်ငါးနာရီလောက်ကတည်းက တိုက်ပွဲဖြစ်နေတာ၊ တိုက်ပွဲက တော်တော်ပြင်းထန်တယ်ထင်တယ်။ ပစ်ခတ်သံတွေက တော်တော်ကျယ်တယ်။ ဒီနေ့ ရာသီဥတု မိုးရွာလို့ တိမ်ထူတော့၊ လေယာဉ်လာလို့ မရဘူးလေ။ အဲ့တော့ သူတို့က လက်နက်ကြီးနဲ့ တောက်လျှောက်ကို ပစ်နေတော့တာ။ ” လို့ ကလေးမြို့ဒေသခံတစ်ဦးက ပြောပါတယ်။
တီးတိန်မြို့နယ်၊ သိုင်းငင်းရွာက ကလေး-ဖလမ်း-ဟားခါး- ကလေး-တီးတိန် လမ်းမကြီးပေါ်မှာ တပ်စွဲထားတဲ့ စစ်ကောင်စီတပ်စခန်းကို စီးယင်းဒေသကာကွယ်ရေးအဖွဲ့ CDF CDM Siyin က သိမ်းပိုက်ရေး ဝင်ရောက်တိုက်ခိုက်နေတာဖြစ်ပါတယ်။
ဒီကနေ့ မနက် ၅နာရီလောက်ကနေ သတင်းရေးနေချိန် နေ့လည် ၁၂နာရီလောက်အထိ စစ်ကောင်စီတပ်တွေက ၊ရှစ်မိုင် ကလေးမြို့တက္ကသိုလ်ဝန်းထဲကနေ လက်နက်ကြီးနဲ့ ဆက်တိုက်ပစ်ခတ်နေတာဖြစ်ပြီး အနည်းဆုံး လက်နက်ကြီးပစ်ခတ်သံ အကြိမ် သုံးဆယ်ထက်မနည်း ကြားရတယ်လို့ ဒေသခံတွေက ပြောပါတယ်။
ဒီဇင်ဘာ ၂ရက်နေ့ ညပိုင်းကလည်း သိုင်းငင်းကျေးရွာက စစ်ကောင်စီတပ်စခန်းကို CDF CDM Siyin က ဝင်ရောက်တိုက်ခိုက်ခဲ့ပြီး စစ်ကောင်စီတပ်က လေကြောင်းရော၊ လက်နက်ကြီးပါ ပစ်ခတ်ခဲ့တာကြောင့် ဆုတ်ခွာခဲ့ရပါတယ်။
ကလေး-သိုင်းငင်း- တီးတိန် လမ်းမကြီးနဲ့ ချင်းပြည်နယ်မြောက်ပိုင်း အဝင်ပေါက်ကို သွားလာတာတွေ မလုပ်ကြဖို့ နိုဝင်ဘာ ၂၇ရက်နေ့မှာ CDF CDM Siyin က ထုတ်ပြန်ထားပါတယ်။
HeiSok Khai
