ကျီးခါးတွင် မြန်မာ-အိန္ဒိယ နယ်စပ်ကုန်သွယ်ရေးဈေးတန်းတည်ဆောက်ဖို့ မြေနေရာတိုင်းတာ
ချင်းပြည်နယ် မြောက်ဘက်အစွန်ဆုံးမှာရှိတဲ့ တွန့်ဇံမြို့နယ်၊ ကျီးခါးမြို့ ခင်မန်းကျေးရွာတွင် မြန်မာ-အိန္ဒိယ နယ်စပ်ကုန်သွယ်ရေးဈေးတန်းတည်ဆောက်ဖို့ ဇူလိုင် (၁၈)ရက်က တာဝန်ရှိပုဂ္ဂိုလ်များကွင်းဆင်းတိုင်းတာကြကြောင်းသတင်းရရှိပါတယ်။
ယင်းကွင်းဆင်းအဖွဲ့တွင် ထွေအုပ်ရုံး၊ ရဲတပ်ဖွဲ့၊ လမ်းဦးစီးဌာန၊ စည်ပင် နဲ့ မြေစာရင်းဌာနမှတာဝန်ရှိသူများပါဝင်ကြပါတယ်။
တွန့်ဇံမြို့နယ် မြေစာရင်းဦးစီးဌာနမှတာဝန်ရှိသူတစ်ဦးက “အဓိကတော့ မြန်မာ – အိန္ဒိယနယ်စပ် ထွက်ပေါက်တွေများများပေါ်ပေါက်စေချင်တယ်။ ဒါမှ ကုန်စည်စီးဆင်းမှုကမြန်ဆန်မှာလေ။ ဒီဈေးကလည်း အိန္ဒိယ တာဝန်ယူတည်ဆောက်ပေးမယ်” လို့ပြောပါတယ်။
ယင်းနေရာကို ၂၀၁၈ ခုနှစ် နိုဝင်ဘာလ ၁ ရက်နေ့တွင် အိန္ဒိယ -မြန်မာ တာဝန်ရှိပုဂ္ဂိုလ်တွေက ကွင်းဆင်းစစ်ဆေးထားပြီဖြစ်ပါတယ်။ လက်ရှိ ချင်းပြည်နယ်မှ အိန္ဒိယ – မြန်မာ နယ်စပ်ဂိတ်ဟာ ရိခေါ်ဒါရ်ဂိတ်တစ်ခုသာရှိပြီး ဖလမ်းမြို့နယ်နဲ့ ထန်တလန်မြို့နယ်တွင် နယ်စပ်ကုန်သွယ်ရေးဂိတ် ထပ်ဖွင့်ရန် ပြည်နယ်အစိုးရက ရည်မှန်းထားပါတယ်။
