တွန်းဇံမြို့နယ် တွီးတုမ်းကျေးရွာနားမှာ ဒီနေ့ညနေ (၁)နာရီမှာ ကျောက်၊သဲတင်တဲ့ကားတစ်စီးဟာ လမ်းဘေး ပေ(၁၂၀)အနက်မှာကျလို့ ကားဆရာ တစ်ဦးသေဆုံးပြီး၊ ကားနောက်လိုက် နှစ်ဦးဒဏ်ရာရရှိတယ်လို့သိရပါတယ်။
“ကားဆရာက ပွဲချင်းပဲသေသွားတယ်။ ကားနောက်လိုက် နှစ်ယောက်ထဲက တစ်ဦးကခြေထောက်ကျိုးတယ်။ သူတို့အခြေအနေက တော်တော်ပြင်းထန်တယ်။ ကားမှောက်တာက အရှိန်လွန်သွားဖြစ်တယ်။ တွီးတုမ်းရွာက တွန်းဇံမြို့နဲ့ တစ်ဆက်တည်းမှာရှိတယ်”လို့မျက်မြင်တစ်ဦးကဆိုပါတယ်။
ဖြစ်စဉ်မှာ ယာဉ်မောင်း ဇမ်ရှင်းဟောက်(၁၉)နှစ်(ဘ)ဦးပေါင်ဆွင်းခမ်သည် ယာဉ်အမှတ်(7L/—-) SKAT(ဖြူ)ဖြင့် နတ်ဇန်ကျေးရွာမှသဲများ တင်ဆောင်ကာ နောက်လိုက် ဆွင်ဗျက်ဆန်(၂၀)နှစ် (ဘ)ဦးဇင့်ရှင်းထန်နှင့် ဒါလ်းဇကပ်(၂၀)နှစ်(ဘ)ဦးထန်ဆွင်းထောင်နှင့်အတူ တွန်းဇံမြို့သို့ ပြန်တက် လာခဲ့ကြသည်။ ကျီခါး-တွန်းဇံလမ်း ကီလိုမီတာ(၅၀-၅၁)ကြား တွန်းဇံမြို့မှ(၅)ဖာလုံခန့်အကွာတွင် အရှိန်မထိန်းနိုင်ဘဲ ချောက်ထဲသို့ (၁၂၀)ပေခန့် ထိုးကျတိမ်းမှောက်လျက်ရှိခဲ့ရာ ယာဉ်မောင်း ဇမ်ရှင်းဟောက်(၁၉)နှစ်သည် ဦးခေါင်းနောက်စေ့ဖူးရောင်ဒဏ်ရာနှင့် ကျောကုန်း ညိုမဲဒဏ်ရာဖြင့် အခင်းဖြစ်ပွားသည့်နေရာတွင် သေဆုံးလျက်ရှိသည်။ ယာဉ်နောက်လိုက် ဆွင်ဗျက်ဆန်(၂၀)နှစ် သည် ဝဲဘက်ခြေသလုံးရိုးကျိုးဒဏ်ရာ(မစိုးရိမ်ရ)ရရှိသည့်အပြင် ဒါလ်းဇကပ်(၂၀)နှစ်သည် ဝဲဘက်မျက်ခုံး ပေါက်ပြဲဒဏ်ရာ(မစိုးရိမ်ရ)ရရှိခဲ့သည်။
