မန်ပြိန်းရွာ စစ်ဘေးရှောင်ပြည်သူအချို့ ဆန်ပြတ်လပ်လို့ချေးယူနေရ
လားရှိုးမြို့နယ်နဲ့ (၁၂)မိုင်အကွာမှာရှိတဲ့ မန်ပြိန်းရွာ စစ်ဘေးရှောင်ပြည်သူတွေဟာ စားနပ်ရိက္ခာနဲ့ နေရာထိုင်ခင်းအတွက် အခက်အခဲကြုံ့တွေ့နေတယ်လို့ စစ်ဘေးရှောင်ပြည်သူတွေထံမှသတင်းရရှိပါတယ်။
၂၀၁၈ ခုနှစ် နိုဝင်ဘာလမှာ SSPP(ရှမ်းပြည်တိုးတက်ရေးပါတီ)နဲ့ RCSS(ရှမ်းပြည်ပြန်လည်ထူထောင်ရေးကောင်စီ)တို့ဟာ မန်ပြိန်းရွာအနီးမှာတိုက်ပွဲဖြစ်ပွားခဲ့တာကြောင့် ကလေးငယ်တစ်ဦး၊ အမျိုးသမီးတစ်ဦးနဲ့ အမျိုးသားနှစ်ဦးသေဆုံးခဲ့တယ်။
ရွာထဲက ကလေးတွေခေါ်ဖို့သွားတဲ့ချိန်မှာသေဆုံးသွားတဲ့အမျိုးသားရဲ့ ဇနီးဒေါ်ခွန်မိုင်( ၃၀နှစ်)က “စားရေးသောက်ရေးက အဆင်မပြေဘူးဆိုလည်း အဆင်ပြေသလိုနေရတယ်။ ဟင်းမရှိရင်လည်း ထမင်းပဲစားတဲ့ချိန်ရှိတယ်။ ဒါကြောင့် အဆင်မပြေရင်လည်းပြေသလိုနေရတာပေါ့။ မေတ္တာဖောင်ဒေးရှင်းက တစ်လစာဆန်ထောက်ပံ့ပေးတာ အခုဆို နှစ်လရှိပြီ။ အိမ်မှာဆန်လည်းမရှိတော့ဘူး။ ကျမတို့ဆို တောင်ယာလုပ်တဲ့သူတွေဆီမှာ ဆန်ကိုခြေးပြီးမှစားနေရတယ်”လို့ ပြောပါတယ်။
ကချင်တိုင်းရင်းသားတွေနေထိုင်တဲ့ မန်ပြိန်းရွာမှာ စစ်ဘေးရှောင်လူဦးရေ(၈၀)ကျော်ရှိပါတယ်။ ၂၀၁၈ ခုနှစ် အောက်တိုဘာလ (၂၆)ရက်ညနေပိုင်းမှာ ရှမ်းလက်နက်ကိုင်တပ်ဖွဲ့အချင်းချင်းပစ်ခတ်ခြင်းကြောင့် မန်ပြိန်းရွာသားတွေဟာ လားရှိုးမြို့သို့ စစ်ဘေးရှောင်ကြပါတယ်။ ဒေသငြိမ်းချမ်းပြီလို့ဆိုကာ ရွာသို့ပြန်လာကာ စပါးတွေရိုက်သိမ်းနေတဲ့ကာလ ၂၀၁၈ နိုဝင်ဘာ (၁၅)ရက်မှာ ထပ်မံတိုက်ပွဲဖြစ်ပွားလို့ အောက်မန်ပြိန်းမှ ထပ်မံစစ်ဘေးရှောင်ကြပါတယ်။
