သက်ငယ်မိန်းကလေးနှစ်ဦးကို မုဒိမ်းပြုကျင့်သည်ဟုစွပ်စွဲထားသော ဧဝံဂေလိဆရာတော် Lal Biak Lar@Lar Boih ကို ယနေ့(ဧပြီ ၂၇)ရက်၌ ကလေးမြို့ ခရိုင်တရားရုံးတွင် ဒုတိယအကြိမ် ချုပ်ရမန်ယူထားကြောင်းသတင်းရရှိသည်။
“မေလ(၁၁)ရက်နေ့ထိ ချုပ်ရမန်ထပ်ယူထားတယ်။ တတိယအကြိမ်ရုံးထုတ်ရမှာလည်း (၁၁)ရက်နေ့ပဲ။ အဲ့ချိန်မှာ အမှုဖြစ်စဉ်တွေကို တရားရုံးမှာတင်ပြမှာ”ဟု တာဟန်းရဲစခန်းမှတာဝန်ရှိသူကဆိုသည်။
ကလေးမြို့နယ် လက်ပံချောင်းကျေးရွာတွင်နေထိုင်သော ဧဝံဂေလိဆရာတော် Lal Biak Lar@Lar Boih သည် ၎င်းနေအိမ်တွင် ဖလမ်းမြို့နယ်မှ လာရောက်နေထိုင်သော မိုင်…..(၁၅)နှစ်ကို ၂၀၁၅ ခုနှစ် ဇွန်လပိုင်းတွင်လည်းကောင်း၊ မိုင်……(၁၄)နှစ်ကို ၂၀၁၈ ခုနှစ် ဧပြီလတွင်လည်းကောင်း အဓမ္မပြုကျင့်ရန်ကြိုးစားအားထုတ်မှု၊ နာကျင်စေမှုတို့ကြောင့် ကလေးမြို့နယ် ရဲစခန်းမှ ပုဒ်မ (၃၇၆/၅၁၁)၊ (၃၂၃)၊ (၅၀၆) တို့ဖြင့် ဧပြီလ(၁၃)ရက်တွင် အမှုဖွင့်ဖမ်းဆီးပြီး ချုပ်ရမန်ယူခြင်းဖြစ်သည်။
