ချင်းအမျိုးသားတစ်ဦး တည်ထောင်ထားတဲ့ GFA(Gospel For Asia) အသင်းဟာ နောက်နှစ်ဘောလုံးရာသီမှာ Chinland FC နာမည်ပြောင်းတော့မယ်လို့ အသင်းဥက္ကဌထံကနေသတင်းရရှိပါတယ်။
GFA အသင်းဥက္ကဌ ပူးတီတီက “ကျနော်တို့အသင်းပရိသတ်တွေက ချင်းအမည်တစ်ခုခုပါတဲ့နာမည်ဖြစ်စေချင်တယ်ဆိုလို့ ဇလပ်မြေ၊ တောင်ဇလပ်၊ အောက်ချင်းငှက်၊ Chinland FC တွေရွေးခိုင်းတော့ အားလုံးလိုလိုက Chinland FC ကိုမဲပေးကြလို့ပြောင်းလိုက်ခြင်းဖြစ်တယ်။ အခုအသင်းနာမည်ပြောင်းဖို့ မြန်မာဘောလုံးအသင်းချုပ်ဆီကိုလည်း စာပို့ထားပြီ။ နောက်နှစ်ဆို Chinland FC ပဲဖြစ်တော့မယ်”လို့ပြောပါတယ်။
GFA အသင်းရဲ့ ကိုယ်ပိုင်လေ့ကျင့်ကွင်း
GFA အသင်းဟာ ၂၀၀၆ ခုနှစ်ကတည်းကစတင်တည်ထောင်ထားတဲ့ အသင်းဖြစ်ပြီး MNL-2 ပြိုင်ပွဲမှာ တစ်ကြိမ် ဒုတိယဆုရခဲ့တယ်။ ချင်းပြည်နယ် ဝန်ကြီးချုပ်ဖလားနဲ့ ကယားပြည်နယ် ဝန်ကြီးချုပ်ဖလားပြိုင်ပွဲတွေမှာလည်း ပထမဆုဆွတ်ခူးခဲ့ကြတယ်။
