မတ် ၁၈၊၂၀၂၆
Zalen
ချင်းပြည်နယ်၊ ဟားခါးမြို့ပေါ်တွင် မတ်လ ၁၅ရက် တနင်္ဂနွေနေ့က ဖူဆယ်ဘောလုံးကစားတဲ့ လူငယ်နဲ့ မြို့ပေါ် လ္ဘက်ရည်ဆိုင်တွင်းတွေပါမကျန် လူငယ်အယောက် ၉၀ နီးပါးခန့်ကို ချင်းအမျိုးသားတပ်ဦး (CNA) မှ ဖမ်းဆီးခဲ့တယ်လို့ ဒေသသတင်းရင်းမြစ်များထံမှ သိရှိရပါတယ်။
အဆိုပါဖမ်းဆီးခံရတဲ့ထဲတွင် ဒေသခံလူငယ်အများအပြားနဲ့ ဖလမ်းမြို့မှ စစ်ဘေးရှောင် လူငယ်တချို့လည်း ပါသွားတယ်လ်ို့ သိရပါတယ်။
ဒေသခံတဦးက “ဘောလုံးကွင်းနားလေးနဲ့ လ္ဘက်
ရည်ဆိုင်တွေကနေ ဖမ်းသွားကြတာဗျ လူငယ်တွေ အများကြီးပဲ ဖမ်းခံရတယ် ဖလမ်းဘက်ကနေစစ်ဘေးလာရှောင်တဲ့ လူငယ်တွေလဲပါသွားကြတယ် ။ သိန်းနှစ်ရာနဲ့ရွေးနိုင်ရင် လွတ်ပေးမယ်လို့လည်းကြားတယ် ခုချိန်ထိလွတ်ပေးတာတော့မရှိသေးဘူး၊ဖမ်းခံရသူတွေရဲ့မိသားစုတွေက စိတ်ပူငိုယိုနေကြရတယ်၊ စစ်တပ်ကိုကြောက်လို့ရှောင်လာတယ် သူတို့တွေက စစ်တပ်လိုလုပ်နေကြတယ်လို့ “Zalen ကိုပြောပါတယ်။
အဆိုပါ ဖမ်းဆီးမှုတွင် CNA ဘက်မှငွေညစ်တောင်းခံ မှုများလည်းရှိနေပြီး ယခုအချိန် အထိ ပြန်လည် လွတ်မြောက်လာသူ မရှိသေးဘူးလို့သိရှိရပါတယ်။
ပြီးခဲ့တဲ့ မတ်လ ၁၂ရက်နေ့က ပြုလုပ်တဲ့အွန်လိုင်းရန်ပုံငွေရှာခြင်းအစီအစဉ်တခုတွင် ချင်းအမျိုးသားတပ်ဦးမှ ဗိုလ်မှူးကြီးဆော်လမွန်ကအရွယ်ရောက်ပြီးကျန်းမာသူတိုင်း စစ်မှုမထမ်းမနေရဆိုတဲ့အဆိုပြုချက်ကို အတည်ပြုလိုက်ကြောင်းပြောကြားထားပါတယ်။
ယင်းအဆိုပြုချက်မထွက်ခင် ဖေဖော်ဝါရီလကုန်၊ မတ်လဆန်းပိုင်းကစပြီး ချင်းပြည်နယ်မြောက်ပိုင်း ထန်တလန်မြို့နယ်အတွင်းရှိ ကျေးရွာများမှာ စစ်မှုထမ်းဖို့လူငယ်များစတင်စုဆောင်းနေသလို ချင်းပြည်တောင်ပိုင်း၊ ပလက်ဝမြို့နယ်မှ ထွက်ပြေးလာကြတဲ့ လူငယ်များလည်း လမ်းခုလတ်ရှိ ချင်းပြည်ကောင်စီတပ်ဖွဲ့ဝင် စစ်ဆေးရေးဂိတ်များမှာ ဖမ်းဆီး တာတွေလည်းရှိနေတယ်လို့ မြေပြင်သတင်းအရင်းအမြစ်များထံကနေ သိရပါတယ်။
မိုင်နွေဦး
ဓာတ်ပုံ-ပုံဟောင်း
#ဟားခါးမြို့#CNA#လူငယ်#ဖမ်းဆီး#Zalen
