မတ် ၁၈၊ ၂၀၂၆
Zalen
၂၀၂၆ ခုနှစ်၊ ပြည်ထောင်စုရဲ့ အခွန်အကောက်ဥပဒေ ထွက်ပေါ်လာပြီးနောက် လျှပ်စစ်ကား (EV) တွေပေါ် အခွန် ၅ ရာခိုင်နှုန်း ကောက်ခံမည်ဆိုတဲ့ သတင်းနဲ့ပတ်သက်၍ အများပြည်သူအကြား ရောထွေးမှုတွေ ရှိနေပါတယ်။
အဆိုပါ ၅ ရာခိုင်နှုန်းဆိုသည်မှာ အခွန်စုစုပေါင်းကို ဆိုလိုတာ မဟုတ်ဘဲ အထူးကုန်စည်ခွန် (ST) တစ်မျိုးတည်းကိုသာ ဆိုလိုခြင်းဖြစ်တယ်လို့ ကားလောကသားတွေ ထောက်ပြပြောဆိုကြပါတယ်။
ပုံမှန်အားဖြင့် ပြည်ပမှ မော်တော်ယာဉ်တစ်စီး တင်သွင်းရာတွင် အဓိကပေးဆောင်ရတဲ့ အခွန် (၅) မျိုးရှိပြီး အကောက်ခွန်၊ ကုန်သွယ်လုပ်ငန်းခွန် ၊ အထူးကုန်စည်ခွန်၊ ယာဉ်မှတ်ပုံတင်ကြေး (ကညနခ) နဲ့ ဝင်ငွေခွန် တို့ ဖြစ်ကြပါတယ်။
ယခင်က EV ကားများ တင်သွင်းရာမှာ ဝင်ငွေခွန်မှအပ ကျန်အခွန်အခကို ကင်းလွတ်ခွင့် ပေးထားခဲ့ပေမဲ့ ယခုထုတ်ပြန်ချက်အရ အထူးကုန်စည်ခွန် (ST) ကို ကင်းလွတ်ခွင့် မပြုတော့ဘဲ ၅ ရာခိုင်နှုန်း စတင်ကောက်ခံတော့မည်လို့ သိရပါတယ်။
ကျန်ရှိနေတဲ့ အကောက်ခွန် နဲ့ ကုန်သွယ်ခွန် တို့ကို ဆက်လက်ကင်းလွတ်ခွင့်ပေး၊ မပေးကိုမူ တိတိကျကျ မသိရသေးဘဲ အကယ်၍ ကင်းလွတ်ခွင့် မရရှိတော့ပါက အခွန်အမျိုးအစားအလိုက် ရာခိုင်နှုန်းအသီးသီးကို ထပ်မံပေးဆောင်ရဖွယ် ရှိနေပါတယ်။
ဒါ့ကြောင့် လာမည့် ဧပြီလ ၁ ရက်နေ့ နောက်ပိုင်းမှာ ဝယ်ယူမည့် EV ကားတစ်စီးရဲ့ တန်ဖိုးမှာ လက်ရှိဈေးအပြင် အသစ်ကောက်ခံလာမည့် အခွန်အခတွေကိုပါ ထည့်သွင်းတွက်ချက်ရတော့မည် ဖြစ်ပါတယ်။
အရေးကြီးတဲ့ သတိပေးချက်တစ်ခုအနေဖြင့် လက်ရှိ ဝယ်ယူထားပြီးသော EV ကားတွေဟာ ဆိပ်ကမ်းမှ ထုတ်ယူစဉ်က အခွန်ကင်းလွတ်ခွင့် ရရှိထား ပေမဲ့ ကညနမှာ ယာဉ်မှတ်ပုံတင်ခြင်း မပြုလုပ်ရသေးပါက၊ ဧပြီလ ၁ ရက်နေ့ နောက်ပိုင်း သတ်မှတ်ချက်အသစ်များအရ မှတ်ပုံတင်ကြေး (ကညနခ) ပေးဆောင်ရနိုင်တဲ့ အခြေအနေမျိုး ဖြစ်လာနိုင်တယ်လို့လည်း သိရပါတယ်။
မိမိတို့ဝယ်ယူမည့် EV ကားများအတွက် အခွန် ၅ ရာခိုင်နှုန်းဆိုသည်မှာ အထူးကုန်စည်ခွန် (ST) တစ်မျိုးတည်းအတွက်သာ ဖြစ်ကြောင်းကို သေချာစွာ သိရှိနားလည်ထားဖို့ လိုအပ်တယ်လို့ ထုတ်ပြန်ထားပါတယ်။
သတင်း-ဆလိုင်း
ဓာတ်ပုံ-Chat GPT
#EV #ကားများ#အထူးကုန်စည်ခွန်#၂၀၂၆အခွန်ဥပဒေသစ်#Zalen
