၁၁၊ ဇွန်လ၊၂၀၂၄
Zalen
မီဇိုရမ်ပြည်နယ်၊ လောင်တလိုင်ခရိုင်အတွင်းက အရပ်ဘက်အဖွဲ့အစည်းဖြစ်တဲ့ Central Young Lai Association နဲ့ United League of Arakan က တာဝန်ရှိသူများတွေ့ဆုံဆွေးနွေးပြီးနောက် နှစ်ပတ်ကျော်ကြာ ပိတ်ထားတဲ့ လမ်းပြန်ဖွင့်ပြီလို့သိရပါတယ်။
ပြီးခဲ့တဲ့ မေလ ၂၅ ရက်ကစပြီး လောင်တလိုင်ခရိုင်အတွင်းကနေ မည့်သည့် ကုန်တင်ယာဉ်မဆို မြန်မာနိုင်ငံ၊ ရခိုင်ပြည်ထဲကို မဝင်ဖို့ CYLA က သတိပေးထုတ်ပြန်ခဲ့တာဖြစ်ပါတယ်။
“လောင်တလိုင်ခရိုင်က ပြည်သူများအနေနဲ့ မြန်မာနိုင်ငံ ထဲကို ဝင်ရောက်တာဟာ အခက်အခဲနဲ့ ပြဿနာဖြစ်နိုင် ခြေများလွန်းတာကြောင့် မေလ ၂၅ ရက် ကနေစပြီး ဝင်ထွက်ခွင့်ကို ပိတ်ပင်ခဲ့တယ်။ ဒါပေမယ့် ယခုအချိန်မှာ သူတို့သွားနေကျ လမ်းက တည်ငြိမ်လာပြီဖြစ်သလို United League of Arakan – ULA တာဝန်ရှိသူများနဲ့ ဆွေးနွေးမှုအဆင်ပြေတာကြောင့် မနက်ဖြန် ဇွန်လ ၁၂ ရက် ညနေ ၆ နာရီကနေစပြီး ကားများအဝင်အထွက် ပြန်လုပ်လို့ရပါတယ်။” လို့ CYLA က ဒီကနေ့မှာ သတင်းထုတ်ပြန်ပါတယ်။
ဒါပေမယ့် အခုလိုနှစ်ဖက် အဝင်အထွက်လုပ်ပြီး ကုန်သွယ်နေတာဟာ စောင့်ကြည့်နေဖို့လိုသေးတဲ့ အခြေအနေ ဖြစ်တာကြောင့် CYLA က လေ့လာရေးအဖွဲ့ (Study Team)ကို ဖွဲ့စည်းကာ ရှေ့ဆက်စောင့်ကြည့် နေမယ် လို့ဆိုပါတယ်။
နောင်တစ်ချိန် CYLA ဘက်မှ အကြောင်းထူးလို့ သတင်းထုတ်ပြန်လာတာပဲဖြစ်ဖြစ်၊လုပ်ဆောင်မှုတစ်ခုခု ဖြစ်လုပ်လာမယ်ဆိုရင်လည်း မိဘပြည်သူများလုံခြုံရေးအတွက်သာ လုပ်ဆောင်မှာဖြစ်တာကြောင့် လက်ခံ နားလည်ပေးကြပါရန် တိုက်တွန်းထားပါတယ်။
သတင်း – Grace
