၁၉၊ ဖေဖော်ဝါရီ၊ ၂၀၂၅
Zalen
နိုင်ငံခြားလုံခြုံရေးကုမ္ပဏီတွေ လက်နက်ကိုင်ဆောင်နိုင်တဲ့ ပုဂ္ဂလိကလုံခြုံရေးဝန်ဆောင်မှုဆိုင်ရာ ဥပဒေကို ပြဌာန်းလိုက်ကြောင်း စစ်ကောင်စီက ဖေဖော်ဝါရီလ ၁၈ ရက်နေ့မှာ ထုတ်ပြန်ပါတယ်။
တရုတ်-မြန်မာ နှစ်နိုင်ငံ ပူးပေါင်းလုံခြုံရေးကုမ္ပဏီ (Joint Venture Security Company) ပူပေါင်းလုပ်ဆောင်ဖို့ ရှိနေချိန်မှာပဲ အခုလို ပြဌာန်းထုတ်ပြန်လိုက်တာပါ။
ပုဂ္ဂလိကလုံခြုံရေးဝန်ဆောင်မှုဆိုင်ရာ ဥပဒေထဲမှာ နိုင်ငံခြားလုံခြုံရေးကုမ္ပဏီနဲ့ ပြည်တွင်းက လုံခြုံရေး ကုမ္ပဏီတွေဟာ လိုအပ်တဲ့ လက်နက်၊ ခဲယမ်းကိုင်ဆောင်ခွင့်ကို ပြည်ထဲရေးဝန်ကြီး ဦးဆောင်တဲ့ ပုဂ္ဂလိက လုံခြုံရေးဝန်ဆောင်မှု ကြီးကြပ်ကွပ်ကဲရေး ဗဟိုကော်မတီရဲ့ ခွင့်ပြုချက်ရယူပြီး လက်နက်ခဲယမ်းကိုင်ဆောင်ခွင့် ဥပဒေနဲ့အညီ ဆောင်ရွက်ရမယ်လို့ ဖော်ပြပါတယ်။
ပုဂ္ဂလိက လုံခြုံရေးဝန်ဆောင်မှုလုပ်ငန်း လုပ်ကိုင်သူတွေဟာ စစ်ကောင်စီရဲ့ လုံခြုံရေးဆိုင်ရာအဖွဲ့အစည်းတွေနဲ့ ပူးပေါင်းဆောင်ရွက်ဖို့ အကြောင်းကြားရင် ငြင်းပယ်ခြင်းမပြုဖို့လည်း ဥပဒေမှာ ပြဌာန်းထားပါတယ်။
ပုဂ္ဂလိက လုံခြုံရေးဝန်ဆောင်မှုလုပ်ငန်းလုပ်ကိုင်လိုသူတွေအနဲ့ လိုင်စင်လျှောက်ထားဖို့လိုပြီး မြန်မာကုမ္ပဏီဖြစ်ရင် ငွေကျပ်သိန်းတစ်ထောင်နဲ့ နိုင်ငံခြားကုမ္ပဏီဖြစ်ရင် ငွေကျပ်သိန်းတစ်ထောင်နဲ့ ညီမျှတဲ့ နိုင်ငံခြားသုံးငွေကို စာရင်းသေ အပ်ငွေအဖြစ် ထားရှိမယ်လို့လည်း ဖော်ပြထားပါတယ်။
နိုင်ငံခြားလုံခြုံရေး ကုမ္ပဏီတွေမှာ မြန်မာနိုင်ငံသား ၇၅ ရာခိုင်နှုန်းပါဝင်ရမှာဖြစ်ပြီး လိုင်စင်လျှောက် ထားသူတွေဟာ လုံခြုံရေးနဲ့ တရားဥပဒေစိုးမိုးရေးကို ပျက်ပြားစေတဲ့ သတင်းထွက်ရှိသူတွေကို ခွင့်ပြုပေးမှာမဟုတ်ဘူးလို့ ဆိုပါတယ်။
လုံခြုံရေးလုပ်ငန်းဆောင်ရွက်နေချိန် တရားဥပဒေစိုးမိုးရေးနဲ့ လုံခြုံရေးကိုထိခိုက်စေတဲ့ သတင်းရရှိရင် စစ်ကောင်စီရဲ့ ရဲစခန်းတွေကို သတင်းပေးပို့ရမယ်လို့ သတ်မှတ်ထားပါတယ်။
Helen
