မတ် ၁၂ ၊ ၂၀၂၆
Zalen
ချင်းပြည်နယ်၊ ဟားခါးမြို့နယ်အတွင်း ခရီးသွားလာကြတဲ့ လူငယ် ၁၆ ဦးကို CDF-Hakha စစ်ဆေးရေးဂိတ်တခုမှာ တာဝန်ကျတဲ့ရဲဘော်များက တုတ်နဲ့ရိုက်ခဲ့တဲ့အတွက် တောင်းပန်ထားကြောင်း CDF-Hakha က ဒီကနေ့ ထုတ်ပြန်လာပါတယ်။
ထုတ်ပြန်ချက်ထဲမှာ ပြီးခဲ့တဲ့ မတ်လ ၇ ရက်နေ့မှာ စစ်ဆေးရေးဂိတ်တစ်ခုရှိတာဝန်ကျရဲဘော်များက ခရီးသွား လူငယ် ၁၃ ဦးကို ၂ ချက်စီ နဲ့ ၃ ဦးကို ၁ ချက်စီ တုတ်ဖြင့်ရိုက်နှက်ခဲ့တာလို့ဆိုပါတယ်။
ဒီကိစ္စနဲ့ပတ်သက်ပြီး ရိုက်နှက်ခံရသူများနဲ့ CDF-Hakha ကြားတွေ့ဆုံခဲ့ကြပြီး လုပ်ထုံးလုပ်နည်းနဲ့မညီဘဲ တုတ်နဲ့ ရိုက်နှက်ခဲ့တာမှားယွင်းထားလို့ ခွင့်လွှတ်ပေးဖို့တောင်းပန်ခဲ့တယ်လို့ ဆိုထားပါတယ်။
တဖက်က လူငယ်များအနေဖြင့်လည်း အချင်းချင်းကြားအခုလိုဖြစ်ရပ်ဖြစ်ပေါ်လာတဲ့အပေါ်အလွန်ဝမ်းနည်းကြောင်း၊ နောက်နောင်ဆင်ခြင်နိုင်ဖို့နဲ့ အခြားလူများဒီလိုဖြစ်ရပ်နောက်ထပ်မကြုံဖို့အတွက်သင်ခန်းစာ ဖြစ်ပါစေလို့ပြောကြားပြီး နှစ်ဦးနှစ်ဖက်လက်ဆွဲနှုတ်ဆက်ကာ ဆုတောင်းကြပြီးပြေလည်ခဲ့ကြတယ်လို့ ဆိုပါတယ်။
CDF-Hakha ဟာ တိုင်းပြည်နဲ့လူမျိုးအတွက်ရပ်တည်လာတဲ့ အဖွဲ့အစည်းဖြစ်တာနဲ့အညီ ပြည်သူများက လေးစားဝန်းရံတဲ့အဖွဲ့အစည်းဖြစ်ဖို့ ပြည်သူများကိုကျွန်တော်တို့ကိုယ်တိုင်လေးစားရမယ်ဆိုတဲ့ ကျင့်ဝတ်ကို လည်းရေးဆွဲထားတယ်လို့ဆိုပါတယ်။
ဒါကြောင့် လုပ်ထုံးလုပ်နည်းနဲ့မညီတဲ့ CDF-Hakha လှုပ်ရှားမှုတွေ့ရှိပါက သတ္တိရှိရှိထောက်ပြကြဖို့နဲ့ အသိပေး ကြဖို့ တိုက်တွန်းထားပါတယ်။
ဒီဖြစ်စဉ်ဟာ ပြီးခဲ့တဲ့ မတ်လ ပထမပတ်အတွင်း ဟားခါးမြို့ကနေ ဇိုခွါဒေသကိုသွားရောက်ခဲ့ကြတဲ့ သိက္ခာတော်ရ ပါစတာတစ်ဦးနဲ့ လိုက်ပါလာတဲ့လူငယ်များ ရွာကနေဟားခါးကို ပြန်လာတဲ့လမ်းမှာဖြစ်ပွားခဲ့တာလို့သိရပါတယ်။
သတင်း – Mickey
