ဖလမ်းနဲ့ကလေး ကားလမ်းပေါ်ရှိ ဇောင်ကောင်းရွာအနီးမှာ လမ်းအပေါ်ဘက်ကနေမြေပြိုကျလို့ ကားလမ်းပိတ်ပြီး ဒီည ၁၀း၄၀နာရီထိ ခရီးသည်တင်ကား (၂၀)ကျော်ပိတ်မိနေတယ်လို့ ခရီးသည်တစ်ဦးထံမှသတင်းရရှိပါတယ်။
ကားလမ်း စပိတ်တာက ညနေ(၂)နာရီလောက်ကဖြစ်ပြီး အခုချိန်မှာ စက်ကြီးနှစ်စီးသုံးစီးလောက်က လမ်းရှင်းနေပေမယ့် လမ်းအပေါ်ဘက်ကနေအဆက်မပျက်မြေပြိုကျလာပါတယ်။
ကားလမ်းအပေါ်ဘက်က ပြိုကျလာတဲ့ မြေတွေကို စက်ကြီးတွေက ရှင်းလင်းနေစဉ်(Photo: JC)
ဖလမ်းကနေ ကလေးကိုဆင်းလာတဲ့ ပိတ်မိခရီးသည်တစ်ဦးက “အခု ကားလမ်းပိတ်တဲ့နေရာက ကလေး-ဟားခါးလမ်းတစ်လျှောက်မှာ ရာသီဥတုအအေးဆုံးနေရာဖြစ်တော့ အခု ကားလမ်းဘေးမှာ မီးလှုံနေကြတယ်။ ခုလည်း စက်ကြီးတွေကမြေစာတွေရှင်းနေပေမယ့် အပေါ်ဘက်ကနေ ရှင်းသလောက်ပြန်ပြန်ကျလာတယ်။ ဒါကြောင့် ကားတစ်ဝက်လောက်ကတော့ ဝေဘူလလမ်းဘက်ကနေသွားဖို့ပြန်လှည့်ကျတယ်။ ဖလမ်း-ဟားခါး-ထန်တလန်ဘက်ကနေလာတဲ့ကားက (၁၅)စီးလောက်ပိတ်မိနေတယ်။ ကလေးဘက်ကနေတက်လာတဲ့ ကားတော့မသိဘူး။ သူတို့ကတော့ ဗာလုံရွာအိပ်လို့ရတော့ တော်သေးတာပေါ့”လို့ပြောပါတယ်။
