ကလေးမြို့ နယူးဧဒင်တည်းခိုခန်းတွင် အမျိုးသမီးအလောင်းတွေ့ရှိ
ကလေးမြို့ တာဟန်းရပ်ကွက်ရှိ နယူးဧဒင်တည်းခိုခန်းတွင် ပြင်ဦးလွင်မြို့မှလာရောက်တည်းခိုတဲ့ မခင်သန်းမြင့် (၄၁ နှစ်)အလောင်းကို ဒီမနက်တွေ့ရှိတယ်လို့ သတင်းရရှိပါတယ်။
ဖြစ်စဉ်မှာ ကလေးမြို့၊ တာဟန်းရပ်ကွက် နယ်မြေ (၂)ရှိ နယူးဧဒင်ဧည့်ရိပ်မွန် တည်းခိုခန်း အခန်းအမှတ် (၇)တွင် အမျိုးသမီးတစ်ဦးသေဆုံးကြောင်း နယူးဧဒင်ဧည့်ရိပ်မွန် တည်းခိုခန်းမန်နေဂျာက တာဟန်း ရဲကင်းမှူးထံ သြဂုတ်လ (၂၉)ရက် နေ့လည် ၁ နာရီကျော်တွင်အကြောင်းကြားလာပါတယ်။ ကလေးမြို့နယ် ရဲတပ်ဖွဲ့ဝင်များက သွားရောက်စစ်ဆေးရာ သေဆုံးသူမှာ မခင်သန်းမြင့် (၄၁ နှစ်) (ဘ)ဦးလှငွေ၊ အမှတ် (၁၃၃)၊ ချယ်ရီးလမ်း၊ ပြင်ဦးလွင်မြို့တွင်နေထိုင်တဲ့သူဖြစ်ကြောင်းသိရှိရပါတယ်။
၎င်းဟာ ပါးစပ်၊ နှာခေါင်း၊ စအိုစသည်တို့မှ သွေးများယိုစိမ့်နေကြောင်းတွေ့ရှိရပါပြီး ၎င်းဟာ အသဲရောဂါဖြစ်မကြာခဏဆေးကုသမှုခံယူနေရသူဖြစ်ပေမယ့် အရက်ဖြတ်ခြင်းမရှိပဲဆက်လက်သောက်သုံးနေကြောင်း၊ အလောင်းပြင်ပဒဏ်ရာတစ်စုံတစ်ရာမတွေ့ရကြောင်း၊ အလောင်းအား ကလေးမြို့ပြည်သူ့ဆေးရုံ ရင်ခွဲရုံတွင် စစ်ဆေးလျက်ရှိပါတယ်လို့ ရဲမှတ်တမ်းအရသိရပါတယ်။
