ပြည်တွင်း၊ပြည်ပ ချင်းတိုင်းရင်းသားလုပ်ငန်းရှင်များအားလုံးပါဝင်နိုင်တဲ့ ချင်းတိုင်းရင်းသားလုပ်ငန်းရှင်များအသင်းကို ဒီနေ့ ညနေ (၃)နာရီမှာ ရန်ကုန်မြို့၊ ဗဟန်းမြို့နယ်ရှိ ချင်းပြည်နယ်ကုန်သည်များနှင့် စက်မှုလက်မှုလုပ်ငန်းရှင်များအသင်းရုံးတွင် စတင်ထည်ထောင်လိုက်ပါတယ်။
ချင်းတိုင်းရင်းသားလုပ်ငန်းရှင်များအသင်း ဥက္ကဌ ဦးကပ်ခင်းပေါင်
ချင်းတိုင်းရင်းသားလုပ်ငန်းရှင်များအသင်း ဥက္ကဌ ဦးကပ်ခင်းပေါင်က “ချင်းပြည်နယ်ကုန်သည်များနှင့် စက်မှုလက်မှုလုပ်ငန်းရှင်များအသင်း နဲ့ ချင်းတိုင်းရင်းသားလုပ်ငန်းရှင်များအသင်း ဘာကွာလဲဆိုရင် ချင်းပြည်နယ်ကုန်သည်များနဲ့စက်မှုလက်မှုလုပ်ငန်းရှင်များအသင်းက ပြည်နယ်ကိုအခြေခံပါတယ်။ ပြည်နယ်မှာရှိတဲ့ စီးပွားရေးလုပ်ငန်းဖွံ့ဖြိုးတိုးတက်အောင်၊ ချင်းပြည်နယ်မှာ ရင်းနှီးမြှပ်နှံမှုလာအောင်၊ ပြည်နယ်ကနေ ထုတ်ကုန်တွေများများထုတ်လုပ်နိုင်အောင်၊ အသေးစားအလတ်စားစီးပွားရေးလုပ်ငန်းတွေများများထွက်အောင် အဓိကထားပြီးဖွဲ့စည်းခဲ့တာဖြစ်တယ်။ ကျနော်တို့ ဒီနေ့ဖွဲ့တဲ့အသင်းကတော့ တိုင်းရင်းသားလုပ်ငန်းရှင်များအသင်းဖြစ်တဲ့အတွက် လူကို အဓိကထားတဲ့အသင်းဖြစ်ပါတယ်။ ဘာဖြစ်လို့ ချင်းလူမျိုးမှာစီးပွားရေးသမားများများမရှိတာလဲ၊ အဲ့ဒီအခက်အခဲကိုရှာမယ်။ သူတို့မှာ ဘာအခက်အခဲရှိလို့ လုပ်ငန်းရှင်မဖြစ်ကြတာလဲဆိုတာရှာဖွေပြီးတော့ ကျနော်တို့တက်နိုင်သလောက်ပံ့ပိုးပေးဖို့ဖြစ်ပါတယ်။ ချင်းလုပ်ငန်းရှင်တွေအများကြီးထွက်လာအောင် ကြိုးစားမယ်”လို့ပြောပါတယ်။
ချင်းတိုင်းရင်းသားလုပ်ငန်းရှင်များအသင်း အတွင်းရေးမှူးက ဦးပါချုံးငါ၊ ဘဏ္ဍာထိန်းက ဦးကီးအောင်နိုင်းဖြစ်ပြီး အဖွဲ့ဝင်(၂၁)ယောက်၊ နာယက (၅)ယောက်၊ အကြံပေး(၅)ယောက်တို့နဲ့ဖွဲ့စည်းထားပါတယ်။
