နိုဝင်ဘာ ၂၅၊ ၂၀၂၅
Zalen
ထိုင်းနိုင်ငံတောင်ပိုင်း ဆုန်ခလာပြည်နယ်ရှိ စီးပွားရေးမြို့တော် ဟတ်ယိုင် (Hat Yai) မြို့ဟာ နှစ် ၃၀၀ အတွင်း အဆိုးရွားဆုံး မိုးရေချိန်ကြောင့် ယနေ့ နိုဝင်ဘာ ၂၅ ရက်နေ့မှာ ကြီးမားသော သဘာဝဘေးအန္တရာယ်နဲ့ ရင်ဆိုင်ခဲ့ရပြီး မြို့လယ်ခေါင်ရှိ အဓိကနေရာများ ရေအောက်ရောက်ခဲ့ရပါတယ်။
ပြီးခဲ့တဲ့ နိုဝင်ဘာ ၂၁ ရက်နေ့ ဟတ်ယိုင်မြို့မှာ တစ်ရက်တည်း မိုးရေချိန် ၃၃၅ မီလီမီတာ အထိ စံချိန်တင် ရွာသွန်းခဲ့ပြီး ယင်းဟာ ဒေသရဲ့ သမိုင်းတစ်လျှောက် အမြင့်ဆုံး မိုးရေချိန် ဖြစ်လာခဲ့ပါတယ်။
မိုးရေများ စီးဆင်းမှု နည်းပါးသောကြောင့် ခလွန့် အူတဖောင်း (Khlong U-Taphao) တူးမြောင်းဟာ အရေးပေါ် အဆင့်ထက် ကျော်လွန် မြင့်တက်လာခဲ့ပြီး ရလဒ်အနေဖြင့် ဆုန်ခလာပြည်နယ် အုပ်ချုပ်ရေးမှူးက မြို့နယ်တစ်ခုလုံးကို “သဘာဝဘေးအန္တရာယ်ဇုန် (Disaster Zone)” အဖြစ် တရားဝင် ကြေညာခဲ့ပါတယ်။
နိုဝင်ဘာ ၂၅ ရက်နေ့မှာ ဟတ်ယိုင်မြို့လယ်ရှိ စီးပွားရေး အချက်အချာကျသော လမ်းမတွေမှာ ရေအမြင့်ဟာ ၀.၅ မီတာမှ ၂.၅ မီတာ (၂ ပေမှ ၈ ပေခန့်) အထိ လွှမ်းမိုးခဲ့ပါတယ်။
အထူးသဖြင့် ဟတ်ယိုင် နိုင်းတံတား အနီးတစ်ဝိုက်နဲ့ မြို့တွင်းအနိမ့်ပိုင်းနေရာများက ကားများ၊ ဆိုင်ကယ်များ ရေမြုပ်လုနီးနီး အခြေအနေထိ ရောက်ရှိခဲ့ပါတယ်။
ရေကြီးမှုဒဏ်ကြောင့် မြို့ရဲ့ အဓိက ဆေးရုံဖြစ်တဲ့ ဟတ်ယိုင်မြို့ ဆေးရုံ ရဲ့ အခြေအနေမှာ အလွန်စိုးရိမ်ဖွယ်ရာ ရှိလာခဲ့ပြီး ဆေးရုံထဲသို့ ရေများ ဝင်ရောက်ကာ အောက်ဆီဂျင် ပြတ်လပ်မှုအန္တရာယ်ကိုပါ ရင်ဆိုင်ခဲ့ရတယ်လို့ သိရပါတယ်။
အာဏာပိုင်များသည် အရေးပေါ် လေယာဉ် များကို အသုံးပြု၍ အရေးပေါ် လူနာ ၉၀ ခန့် ကို အနီးအနားရှိ ဘေးလွတ်ရာ ဆေးရုံများသို့ အချိန်မီ လွှဲပြောင်းပေးခဲ့ရပါတယ်။
ဒေသခံ အာဏာပိုင်များက အန္တရာယ်ရှိ ဇုန်များမှ ဒေသခံများအားလုံးကို အလုံးစုံ ရွှေ့ပြောင်းရန် အမိန့်ပေးခဲ့ပြီး စစ်တပ်၊ ရဲတပ်ဖွဲ့နဲ့ အရပ်ဘက် ကယ်ဆယ်ရေးအဖွဲ့များ (မြောက်ပိုင်း ချင်းမိုင်အထိပါ) ဟာ လှေများနဲ့ အထူးယာဉ်များဖြင့် ပြည်သူများကို ကူညီကယ်ဆယ်ရေး လုပ်ငန်းများ အားသွန်ခွန်စိုက် လုပ်ဆောင်လျက်ရှိပါတယ်။
ရေဘေးသင့် ပြည်သူများကို Prince of Songkla University (PSU) နဲ့ Songkhla Rajabhat University ကဲ့သို့သော ဘေးလွတ်ရာ ခိုလှုံရာနေရာများတွင် လက်ခံထားရှိပါတယ်။
ထိုင်းမိုးလေဝသဌာနရဲ့ ခန့်မှန်းချက်အရ မိုးသည်းထန်မှုမှာ လာမယ့် ရက်အနည်းငယ်အတွင်း လျော့ကျသွားနိုင်သော်လည်း ရေကြီးရေလျှံမှု အခြေအနေမှာ ချက်ချင်း ပြန်လည်ကောင်းမွန်ရန် မရှိသေးတာကြောင့် ဒေသခံပြည်သူများနဲ့ ခရီးသွားများအနေနဲ့ အရေးပေါ် သတိပေးချက်တွေကို လိုက်နာပြီး သတိနဲ့ နေထိုင်သွားလာရန် အထူးလိုအပ်ကြောင်း သိရပါတယ်။
ကိုးကား-ထိုင်းသတင်းများ
သတင်း-ဆလိုင်း
