မဏီပူရ်ပြည်နယ်တွင် ကသည်းနဲ့ ချင်းအနွယ်ဝင်များ အဓိကရုဏ်းဖြစ်ပွားလို့ မိုးရေးမြို့နဲ့အခြားမြို့တွေမှာ ပစ်ခတ်မှုနဲ့မီးလောင်မှုဖြစ်ပွား

အိန္ဒိယနိုင်ငံ၊ မဏီပူရ်ပြည်နယ်တွင် ကသည်းလူမျိုးနဲ့ ချင်းအနွယ်ဝင် ကူကီး၊ ပိုင်သဲ(ဇိုမီး)များကြား ယနေ့ မေ ၃ ရက်တွင် အဓိကရုဏ်းဖြစ်ပွားလို့ မြန်မာနယ်စပ် မိုးရေးမြို့အပါအဝင် အခြားမြို့များတွင် မီးလောင်မှုဖြစ်ပွားလို့ ခရိုင် ၅ ခုတွင် ညမထွက်ရအမိန့် သတ်မှတ်လိုက်တယ်လို့သတင်းရရှိပါတယ်။

မဏီပူရ်ပြည်နယ်အစိုးရက ချင်းအနွယ်ဝင် ကူကီးနဲ့ ပိုင်သဲ (ဇိုမီး)လူမျိုးအများစုနေ ထိုင်တဲ့ တောင်တန်းဒေသကို သစ်တောဧရိယာအဖြစ်သတ်မှတ်လို့ ယင်းဥပဒေ ပြဌာန်းချက်ကိုမကျေနပ်လို့ဆန္ဒပြရာကနေ အခုလို အဓိကရုဏ်းဖြစ်ပွားတာဖြစ်ပါတယ်။

ယင်းဥပဒေကြောင့် တောင်တန်းဒေသမှာနေထိုင်တဲ့ ချင်းအနွယ်ဝင်များနေထိုင်တဲ့ ကျေးရွာများဖြတ်သိမ်းခံရနိုင်တဲ့အခြေအနေရင်ဆိုင်ကြပါတယ်။

ယနေ့ မေလ ၃ ရက် မနက်ပိုင်းတွင် တစ်ပြည်နယ်လုံးမှာ ကူကီး၊ ပိုင်သဲ၊ နာဂလူမျိုးများက လမ်းပေါ်ထွက်ဆန္ဒပြကြရာ နေ့လည်ပိုင်းတွင် ကသည်းလူမျိုးများက ပိုင်သဲလူမျိုးများနေထိုင်တဲ့ အင်ဖာလ်ခရိုင် Kangvai ကျေးရွာတရွာလုံးနီးပါး မီးရှို့လို့ကလေးငယ်တစ်ဦးသေဆုံးသွားပါတယ်။

မြန်မာနယ်စပ် မိုးရေးမြို့မှာလည်း ကူကီးလူမျိုးများက ဆန္ဒပြကြရာ မိုးရေးမြို့အထက်စျေးမီးရှို့ခံရပြီး သေနတ်သံတွေလည်းကြားရတယ်လို့သိရတယ်။ ဒါကြောင့် မဏီပူရ်ပြည်နယ် ခရိုင် ၅ ခုကို ယနေ့ညကစပြီး ညမထွက်ရအမိန့်ထုတ်ပြန်ထားကာ ၅ ရက်ကြာအင်တာနက်ဖြတ်တောက်မယ်လို့လည်း သတင်းထွက်ပေါ်နေပါတယ်။

ယင်းဥပဒေနဲ့ပတ်သက်ပြီး မီဇိုရမ်ပြည်နယ်က လူမှုရေးအဖွဲ့အစည်းနဲ့ ကျောင်းသားအဖွဲ့အစည်းများက မဏီပူရ်ပြည်နယ်အစိုးရက တောင်တန်းဒေသလူမျိုးစု အပေါ်လုပ်ဆောင်ချက်ကို ကန့်ကွက်ရှုပ်ချတဲ့ကြေညာချက်များထုတ်ပြန်ကြပါတယ်။