စစ်ကိုင်းတိုင်း၊ ကလေးမြို့နယ် နတ်ချောင်းကျေးရွာက အသက် (၁၃)နှစ်အရွယ် ကလေးတစ်ယောက်အပါအဝင် လူ (၂)ယောက်တို့ဟာ ဧပြီလ (၂)ရက်နေ့က ကျဆုံးသွားတယ်လို့သတင်းရရှိပါတယ်။
အာဏာလုစစ်ကောင်စီတပ်က နတ်ချောင်းနဲ့ ချောင်းခွရွာကြားက ရထားသံလမ်းပေါ်တွင် နတ်ချောင်းရွာသား (၁၃)နှစ်အရွယ် မောင်ညီနိုင်ဖြိုးဟာ ဝမ်းဗိုက်ကျည်ထိလို့ ကျဆုံးသွားပါတယ်။
လယ်မှဆိုင်ကယ်နဲ့ပြန်လာတဲ့ နတ်ချောင်းရွာသား ကိုအောင်နိုင်ထွေး (၂၂နှစ်)ကို ချောင်းခွရွာအကျော် ပါမွန်ချောင်းတံတား (ကလေး-ဂန့်ဂေါလမ်း)မှာ အာဏာလုစစ်တပ်က ပေါင်နဲ့ ခေါင်းကို ပစ်ခတ်လို့ ယင်းနေရာတွင် ကျဆုံးသွားပါတယ်။
ဒေသခံတစ်ဦးက “စစ်တပ်က မြင်မြင်သမျှကိုလိုက်ပစ်နေကြတာ။ အဲ့နေ့က သူတို့ကလေးဘက်ကို ဆုတ်ရင်းနဲ့ပစ်တာ။ အလောင်းကို မနေ့ညကပဲ ချက်ချင်းသဂြိုလ်ကြတယ်” လို့ပြောပါတယ်။
နတ်ချောင်းကျေးရွာအနီးတစ်ဝိုက်တွင် အာဏာလုစစ်ကောင်စီတပ်နဲ့ ပြည်သူကြား မတ်လ (၃၁)ရက်မှ ဧပြီ (၂)ရက်နေ့ထိ ပစ်ခတ်မှုကြောင့် ပြည်သူ (၇)ယောက် ကျဆုံးသွားပါတယ်။
အာဏာလုစစ်ကောင်စီတပ်တွေဟာ ကလေးမြို့တောင်ပိုင်းဘက်ကနေ မြို့ထဲကိုပြန်ဆုတ်သွားလို့ တောင်ပိုင်းဘက်တွင် သေနတ်သံမကြားရတော့ပေမယ့် မြို့ထဲမှာ ခံတပ်ဆောက်ထားတဲ့ပြည်သူတွေနဲ့ ဒီနေ့ အခြေအနေတင်းမားနေကြပါတယ်။
