အိန္ဒိယဗဟိုအစိုးရက ပလက်ဝနဲ့ စစ်တွေအထိလျှပ်စစ်မီးပေးဖို့ဆန္ဒရှိနေ

၁၄၊ စက်တင်ဘာလ၊ ၂၀၂၄

Zalen

အိန္ဒိယနိုင်ငံ၊ ဗဟိုအစိုးရက ချင်းပြည်နယ်၊ ပလက်ဝမြို့နဲ့ ရခိုင်ပြည်နယ် စစ်တွေအထိ လျှပ်စစ်ဓာတ်အား ပေးဖို့ဆန္ဒရှိနေပြီး မီဇိုရမ်ပြည်နယ်အစိုးရက ပူးပေါင်းဆောင်ရွက်ပေးရန်ဖိတ်ခေါ်ခဲ့တယ်လို့သိရပါတယ်။။

စက်တင်ဘာလ ၁၂ ရက်နေ့မှာ အိန္ဒိယဗဟိုအစိုးရ၊ ပြည်ပရေးရာဝန်ကြီးဌာန၊ တွဲဖက်အတွင်းရေးမှူး B Shyam က မီဇိုရမ်ပြည်နယ်အစိုးရ လျှပ်စစ်နဲ့စွမ်းအင်ဝန်ကြီး F. Rodingliana ကိုသူ့ရဲ့ရုံးခန်းမှာသွားရောက် တွေ့ဆုံခဲ့ပြီး ယခုလိုပြောကြားခဲ့တာဖြစ်တယ်လို့ မီဇိုရမ်ပြည်နယ်အစိုးရ သတင်းနဲ့ပြန်ကြားရေးဌာနက သတင်းထုတ်ပြန်ပါတယ်။

B Shyam က ချင်းပြည်နယ်၊ ပလက်ဝမြို့နဲ့ စစ်တွေလေဆိပ်အထိလျှပ်စစ်မီးများပေးဖို့ ဆန္ဒရှိကြောင်း ပြောကြားပြီး မီဇိုရမ်အစိုးရအနေနဲ့ ပူးပေါင်းဆောက်ရွက်ပေးဖို့တစ်ခါတည်းတိုက်တွန်းလိုက်ပါတယ်။

F. Rodingliana ကလည်း ဗဟိုအစိုးရ ဆောင်ရွက်မဲ့လုပ်ငန်းတွေအကောက်အထည်ဖော်နိုင်ဖို့ ပူးပေါင်းသွားမယ် လို့ ပြောကြားခဲ့တယ်လို့ သိရပါတယ်။

ဒါ့အပြင် B Shyam နဲ့ F. Rodingliana တို့ဟာ မြန်မာနိုင်ငံ၊ ဘင်္ဂလားဒေ့ရှ်နိုင်ငံတို့နဲ့ ကုန်သွယ်ရေးစနစ်တကျ ဆောင်ရွက်နိုင်ဖို့ ထည့်သွင်းဆွေးနွေးခဲ့ကြကာ မီဇိုရမ်ပြည်နယ်၊ မာမစ်ခရိုင်၊ Silsury ကျေးရွာ နဲ့ အနီးတစ်ဝိုက် မှာ မြေအကောက်ခွန်စခန်း ဒါမှမဟုတ် ပူးပေါင်းစစ်ဆေးရေးဂိတ် (Integrated Check Post) ကို အမြန်တည်ဆောက်ဖို့ဆွေးနွေးခဲ့ကြပါတယ်။

အိန္ဒိယဗဟိုအစိုးရရဲ့ လက်ရှိဖော်ဆောင်လျက်ရှိတဲ့ ကုလားတန်ဘက်စုံသယ်ယူပို့ဆောင်ရေးစီမံကိန်း ( Kaladan Multi Modal Transit Transport Project – KMMTTP)မှာကြုံတွေ့နေတဲ့ စိန်ခေါ်မှုတွေကို အမြန်ဆုံးဖြေရှင်းနိုင်ဖို့ကိုလည်းထည့်သွင်းဆွေးနွေးခဲ့ကြတယ်လို့သိရပါတယ်။

ဘင်္ဂလားဒေ့ရှ်နဲ့ နှစ်နိုင်ငံကြား အလွယ်တကူဆက်သွယ်နိုင်ရန် လုံလေခရိုင် Kawrpuichhuah မှာ တံတားတည်ဆောက်ဖို့ စီမံကိန်းကို ဘင်္ဂလားဒေ့ရှ် ဘက်က အမြန်ဆုံးလက်ခံလာဖို့နဲ့ အဆိုပါလုပ်ငန်းကို စတင်လုပ်ကိုင်နိုင်ဖို့ ဗဟိုအစိုးရက ဖိအား ပေးရန် ဝန်ကြီး F.Rodingliana က B Shyam ထံတောင်းဆိုခဲ့ပါတယ်။

သတင်း – Grace