စက်တင်ဘာ ၂၁၊ ၂၀၂၃။
ချင်းပြည်နယ်၊ ထန်တလန်မြို့မှာ စက်တင်ဘာ ၁၈ရက်နေ့က စစ်ကောင်စီတပ်နဲ့ ချင်းအမျိုးသားတပ်မတော် (CNA)၊ ထန်တလန် ဒေသကာကွယ်ရေးအဖွဲ့ CDF-Thantlang ပူးပေါင်းတပ်ဖွဲ့အကြား တိုက်ပွဲဖြစ်ပွားခဲ့ပြီး CNA တပ်သားတစ်ဦးကျဆုံးကာ သုံးဦးဒဏ်ရာရ ရရှိခဲ့တယ်လို့ ထန်တလန် CDFအဖွဲ့က ပြောပါတယ်။
ထန်တလန်မြို့ထဲရှိ CNA နဲ့ CDF-Thantlang တပ်စွဲထားတဲ့ CB ဘဏ်နဲ့ ရဲစခန်းကို စစ်ကောင်စီတပ်ဖွဲ့က ထိုးစစ်ဆင်တိုက်ခိုက်ခဲ့တာကြောင့် တိုက်ပွဲ ပြင်းထန်ခဲ့တယ်လို့ ဆိုပါတယ်။ အဲဒီတိုက်ပွဲမှာ စစ်ကောင်စီတပ်သား သေဆုံးမှုတွေလည်း ရှိခဲ့ပြီး အရေအတွက် အတိအကျမသိရသေးဘူးလို့ သိရပါတယ်။
ထန်တလန်မြို့ကို ဟားခါးမြို့ကနေ စစ်ကောင်စီတပ်ဖွဲ့က လက်နက်ကြီးတွေနဲ့ ပစ်ကူပေးခဲ့တာကြောင့် တစ်နေကုန်နီးပါးတိုက်ပွဲ ပြင်းထန်ခဲ့တယ်လို့ CDF ထန်တလန်အဖွဲ့က ပြောပါတယ်။
