၂၄၊ ဇွန်၊ ၂၀၂၅
Zalen
ချင်းပြည်နယ်၊ တီးတိန်မြို့နယ်၊ ခိုင်ကမ်းဆင်စခန်းနဲ့ ထန်မွှော် (Thangmual) တောင်တို့ကို စစ်ကောင်စီတပ်က ဇွန် ၂၂ နဲ့ ၂၃ ရက်နေ့တွေမှာ ၂ ရက်ဆက်တိုက် ဗုံးကြဲခဲ့ပြီး အမျိုးသားတစ််ဦး သေဆုံးပြီး နှစ်ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။
တီးတိန်မြို့နယ်၊ ခိုင်ကမ်းမြို့ရှိ ဆင်စခန်းအနီးမှာ ဇွန် ၂၂ ရက်၊ ညနေ ၄ နာရီက စစ်ကောင်စီတပ်ဟာ လေယာဉ်နဲ့ ဗုံးကြဲလို့ အသက် ၁၆ နှစ် အရွယ် လူငယ် တစ်ဦး သေဆုံးခဲ့ပြီး အမျိုးသမီး တစ်ဦး ဒဏ်ရာရရှိခဲ့ပါတယ်။
” ခိုင်ကမ်းနားမှာက တိုက်ပွဲမရှိဘူး၊ ဒီတိုင်းကြဲသွားတာ၊ အဲဒီမှာ အလုပ်လုပ်နေတဲ့ ဆင်ထိန်းလူငယ်တစ်ဦး သေသွားတယ်။ သူ့မိဘတွေကို ဆက်သွယ်တာ ဖုန်းလိုင်းပြတ်နေတော့ မရဘူး၊ အဲဒီအထက် ပိမ်းပိရွာမှာပဲ မနေ့မနက်က မြှုပ်လိုက်တယ်။ ” လို့ ဒေသခံတစ်ဦးက ပြောပါတယ်။
ဒဏ်ရာရရှိတဲ့အမျိုးသမီးကို ကလေးမြို့ ဆေးရုံကြီးမှာ ပို့ပေးခဲ့တယ်လို့ သိရပါတယ်။
တီးတိန်မြို့နယ်၊ သိုင်းငင်းရွာနဲ့ လေးမိုင်ဝေးတဲ့ ထန်မွှော်တောင် (Thangmual) ကို ဇွန် ၂၃ ရက်နေ့က ညနေ ၅နာရီမှာ စစ်ကောင်စီတပ်က လေယာဉ်နဲ့ ဗုံးနှစ်ကြဲချခဲ့တာကြောင့် အမျိုးသမီးတစ်ဦး ဒဏ်ရာရခဲ့တယ်လို့ ဆိုပါတယ်။
” မှိုင်းတွေ တိုက်နေတာတောင် ကြဲသွားတာ၊ အသံအကျယ်ကြီးကြားလိုက်ရတယ်၊ နှစ်ကြိမ်၊ လာတာက နှစ်ခေါက်လာတယ်။ အဲဒီမှာ အရင်က မိသားစု နှစ်စုပဲ ရှိတာ၊ အခုတော့ အောက်ကနေ ရှောင်လာတဲ့ စစ်ရှောင်တွေနေတာ။ အဲဒီကိုကြဲသွားတာ။ ” လို့ ဒေသခံတစ်ဦးက ပြောပါတယ်။
လေကြောင်းတိုက်ခိုက်မှုကြောင့် နေအိမ် တစ်လုံးထိခိုက်ပျက်စီးခဲ့ပြီး ထန်မွှော်မှာ နေထိုင်တဲ့ ဒေသခံတွေနဲ့ စစ်ဘေးရှောင်တွေဟာ ဘေးလွတ်ရာ တိမ်းရှောင်နေရပါတယ်။
ပြီးခဲ့တဲ့ ဧပြီ ၉ရက်ည မှာလည်း တီးတိန်မြို့နယ်၊ ဆိုင်းဇန် (Saizang) ကို စစ်ကောင်စီတပ်က လေကြောင်းနဲ့ ဗုံးကြဲလို့ မိသားစုတစ်စုထဲက ခြောက်ဦး သေဆုံးခဲ့ပါတယ်။
Helen
