အိန္ဒိယ နိုင်ငံ မီဇိုးရမ်ပြည်နယ် နဲ့ အာသံပြည်နယ်ကြား နယ်နမိတ်ပြဿနာဖြစ်ပွားခဲ့တာကြောင့် မီဇိုးရမ်ရဲ့အဓိကကုန်စည်တင်သွင်းတဲ့လမ်းကို အာသံဘက်ကပိတ်ထားလို့ မဏီပူရ်ပြည်နယ်ဘက်မှကုန်စည်တင်သွင်းဖို့ ဒီကနေ့ ကုန်တင်ကားတွေစတင်ထွက်ခွာကြတယ်လို့ မီဇိုးရမ်ပြည်နယ်ပြန်၊ဆက်ရုံးကထုတ်ပြန်ထားပါတယ်။
ဖြစ်စဉ်မှာ အောက်တိုဘာလ (၁၀)ရက်နေ့တွင် အာသံပြည်နယ် ရဲတပ်ဖွဲ့နဲ့ သစ်တောဝန်ထမ်းတွေက မီဇိုးရမ်ပြည်နယ် Thinghlun ကျေးရွာက တောင်ယာတဲကိုမီးရှို့ပြီး ခြံကိုဖျက်စီးကြပါတယ်။ မီဇိုးရမ်ပြည်နယ်လူထုက မကျေမနပ်ဖြစ်လို့ ပြည်နယ် ၂ ခုကြားအခြေအနေတွေပိုမိုတင်းမာလာခဲ့ပါတယ်။ ဒါကြောင့် အာသံဘက်က မီဇိုးရမ်ပြည်နယ်ရဲ့ပြည်မဘက်မှအဓိကကုန်စည်တွေတင်သွင်းတဲ့လမ်းမကြီးကို ပိတ်ထားကြပါတယ်။
မီဇိုးရမ်ပြည်နယ် ထောက်ပံ့ရေးဝန်ကြီး ပူးကေလာလ်ရင်လျန်နာက “မီဇိုးရမ်အတွက်လိုအပ်တဲ့ကုန်စည်တွေတင်သွင်းတဲ့ လမ်းမကြီးကို အာသံနဲ့ နယ်နမိတ်ပြဿနာအမြဲတမ်းဖြစ်လို့ မီဇိုးရမ်ပြည်နယ်အစိုးရက တခြားနည်းလမ်းကိုစဉ်းစားပါတယ်။ ဒါကြောင့် မဏီပူရ်ဘက်ကနေ ဓာတ်ဆီနဲ့ gas သယ်ယူဖို့ ကုန်တင်ကားတွေစေလွတ်တာဖြစ်တယ်” လို့ မီဇီုးရမ်ပြည်နယ် ပြန်၊ဆက်ရုံးကဖော်ပြထားပါတယ်။
ကုန်တင်ကားတွေကို ပြည်နယ်ထောက်ပံ့ရေးဝန်ကြီး၊ ပညာရေးဝန်ကြီးနဲ့ လွှတ်တော်အမတ် (MLA) နှစ်ဦးက လိုက်ပါနှုတ်ဆက်ကြပါတယ်။
