မေ ၁၅၊ ၂၀၂၆
Zalen
ချင်းပြည်နယ်၊ ဟားခါးမြို့ ခလရ ၂၆၆ တပ်ရင်းဗျူဟာမှူး ဦးစီးလိုက်ပါလာတဲ့ စစ်ကောင်စီ စစ်ကြောင်း တိုက်ခိုက်ခံရပြီး ၄ ဦးသေဆုံးပြီး ဗျူဟာမှူးအပါအဝင် အများပြားဒဏ်ရာရရှိခဲ့တယ်လို့ CNA နဲ့ နီးစပ်သူဆီက သိရပါတယ်။
ဖလမ်းမြို့ကနေ ဖလမ်း – ဟားခါး လမ်းအတိုင်း စစ်ကြောင်းထိုးတဲ့ စစ်ကောင်စီ စစ်ကြောင်းကို သွားရောက်ကြိုဆိုတဲ့ စစ်ကောင်စီ စစ်ကြောင်းကို ယမန်နေ့ မေလ ၁၄ ရက်နေ့က ဟားခါးမြို့ ၆ လမ်းဆုံအနီးမှာ တိုက်ခိုက်ခဲ့တာဖြစ်ပါတယ်။
“ဖလမ်းကနေ ဟားခါးကို စစ်ကြောင်း ထိုးလာတဲ့ စစ်ကောင်စီ စစ်ကြောင်းက ဟားခါးမြို့နဲ့ ၁၀ မိုင်ခန့်အကွာ ချွန်ကျုံးရွာကို ရောက်နေပြီလို့ ကြားပါတယ်။ အဲစစ်ကြောင်းကို သွားကြိုဖို့အတွက် ဟားခါးဗျူဟာမှူးကိုယ်တိုင် သွားကြတာ။ ဟားခါး ၆ လမ်းဆုံမှာ ကြားဖြတ်တိုက်ခိုက်ခဲ့တာပါ။” လို့ CNA နဲ့ နီးစပ်သူတစ်ဦးက ပြောပါတယ်။
တိုက်ခိုက်မှုအတွင်း စစ်ကောင်စီတပ်ဖွဲ့ဝင် ၄ ဦးပွဲချင်းပြီး သေဆုံးခဲ့ပြီး ဟားခါး ဗျူဟာမှူးနဲ့ အရာရှိ ၃ ဦးအပါအဝင် အများပြားပြင်းထန်ဒဏ်ရာရရှိခဲ့တယ်လို့ သိရပါတယ်။
အဲဒီ ဒဏ်ရာရရှိတဲ့ ဟားခါးဗျူဟားမှူးနဲ့ အရာရှိတွေကို ဆေးကုသဖို့ ဒီနေ့ မေလ ၁၅ ရက်နေ့မှာ စစ်ကိုင်းတိုင်း၊ ကလေးမြို့ကို ရဟတ်ယာဥ်နဲ့ ခေါ်ဆောင်သွားတယ်လို့ ဟားခါးစစ်ရေးသတင်းအရင်းမြစ်တွေက ပြောပါတယ်။
ဟားခါးဗျူဟာမှူး စစ်ကြောင်း တိုက်ခိုက်ခံရတဲ့အတွက် ချွန်ကျုံးကျေးရွာကို ရောက်ရှိနေတဲ့ စစ်ကောင်စီစစ်ကြောင်းက မနေ့ည သန်းခေါင်ယံအချိန်မှာ ရွာထဲက လူနေအိမ်တွေကို မီးရှို့ဖျက်ဆီးခဲ့ပြီး နေအိမ် ၇ လုံးမီးလောင်ပျက်စီးသွားတယ်လို့ သိရပါတယ်။
“မနေ့ညဘက်ကြီး ရွာဘက်ကနေ စစ်ကြောင်းတွေ မထွက်ခင် မီးရှို့သွားတယ်။ လူနေ အိမ် ၇ လုံးလောက် ပျက်စီးသွားတယ်။” လို့ ဟားခါးစစ်ရေးသတင်းအရင်မြစ်က ပြောပါတယ်။
လက်ရှိ မြို့တော် ဟားခါးအပါအဝင် တွန်းဇံ၊ ဖလမ်း၊ တီးတိန် စတဲ့ ချင်းပြည်နယ်မြောက်ပိုင်းမှာ စစ်ရေးတင်းမာနေပြီး ဒေသခံအများစုဟာ ထွက်ပြေးတိမ်းရှောင်နေကြပါတယ်။
သတင်း-ခူမီး
