မြန်မာနိုင်ငံမှ အိန္ဒိယနိုင်ငံသို့ သွားရောက်ခိုလုံတဲ့ ဒုက္ခသည်တွေအတွက် Benjamin Sum နဲ့ မီဇိုရမ်အဆိုတော် တို့က ဒီမနက် ၁၀ နာရီခွဲတွင် (မြန်မာစံတော်ချိန် ၁၁း၃၀) ရွေ့လျားရှိုးပွဲပြုလုပ်ကြမယ်လို့သတင်းရရှိပါတယ်။
မီဇိုရမ်ပြည်နယ် မြို့တော် အိုက်ဇောလ်မြို့တွင် အဖွဲ့ (၂)ဖွဲ့ခွဲပြီး လူစည်ကားတဲ့ နေရာ (၁၁) နေရာတွင် ရှိုးပွဲပြုလုပ်ကြမှာဖြစ်ပါတယ်။
ယင်း Mobile Charity Concert စီစဉ်တဲ့အဖွဲ့အစည်းကတော့ မီဇိုရမ်ပြည်နယ် အခြေစိုက် MZP, PUMP, NGO UNITED, MZI & MDM စတဲ့အဖွဲ့အစည်းတွေဖြစ်ပါတယ်။
လက်ရှိ မီဇိုရမ်ပြည်နယ်တွင် မြန်မာပြည်မှ ဒုက္ခသည်အဖြစ်သွားရောက်ခိုလုံသူ (၄၀၀)ကျော်ရှိပြီလို့ အိန္ဒိယအခြေစိုက်သတင်းစာတွေက ဖော်ပြထားပါတယ်။
ယင်းပွဲ စီစဉ်သူထဲက တစ်ယောက်အပါအဝင်ဖြစ်တဲ့ ဦးဟိုလျန်က “အိုက်ဇောလ်မြို့မှာရောက်ရှိနေတဲ့ မြန်မာနိုင်ငံသားအားလုံးကို လာရောက်ဝန်းရံပေးကြဖို့ဖိတ်ခေါ်ဗျစေ။ အလှူငွေကို လမ်းဘေးကပြည်သူတွေဆီ လိုက်လံအလှူခံမှာဖြစ်လို့ အလုပ်တွေခဏထားပြီး ကျနော်တို့ချစ်တဲ့ တိုင်းပြည်အတွက် အားစိုက်ထုတ်ရမယ့်အချိန်ဖြစ်တယ်။ ဒီချိန်ဟာ တိုင်းပြည်အတွက် အတူတူဝိုင်းအလုပ်လုပ်ပေးနိုင်တဲ့အချိန်ကောင်းပဲဖြစ်ပါတယ်” လို့ ၎င်းလူမှုကွန်ယက်စာမျက်နှာတွင်ဖော်ပြထားပါတယ်။
အိုက်ဇောလ်မြို့တွင် ချင်းပြည်နယ်နဲ့ ကလေးကဘော်ဒေသမှ သွားရောက်ပြီး ဝမ်းစာရှာဖွေတဲ့သူ ထောင်ဂဏန်းရှိပါတယ်။
