မြန်မာ-အိန္ဒိယနယ်စပ် ကုန်သွယ်ရေးဂိတ်ဖြစ်တဲ့ ဖလမ်းမြို့နယ်၊ ရိခေါ်ဒါရ်မြို့မှာ ကားလေးဝင်းဖွင့်ပွဲကို ဒီမနက် (၉)နာရီမှာကျင်းပပါတယ်။
ကားလေးဝင်းဟာ တီးတိန်မြို့ကနေ ရိခေါ်ဒါရ်မြို့အဝင်ဘက်တွင်တည်ရှိပြီး ဦးမော်သဲက ၎င်းသရက်ခြံ တစ်ဧကကို စည်ပင်ထံလှူဒါန်းထားတာဖြစ်ပါတယ်။
ရိခေါ်ဒါရ်မြို့ အမှတ်(၁)ရပ်ကွက်အုပ်ချုပ်ရေးမှူး ဦးချန်လျန်နာက “ဒီကားလေးဝင်းကို အစိုးရအထောက်အပံ့မပါပဲ တည်ဆောက်ထားတယ်။ မြေကွက်ကို ကိုမော်သဲကလှူတယ်။ ကားဝင်းကို ပုဂ္ဂလိကကုမ္မဏီက နှစ်နှစ်စာချုပ်နဲ့ လုပ်တယ်။ အခန်းငှားခ တစ်လ ငါးသောင်းကို ကုမ္မဏီက နှစ်နှစ်ကောက်ခွင့်ပေးထားတယ်”လို့ဆိုပါတယ်။
ရိခေါ်ဒါရ် ကားလေးဝင်းမှာ အခန်း(၁၇)ခန်းတည်ဆောက်ထားပါတယ်။
ရိခေါ်ဒါရ်မြို့အမှတ်(၂)ရပ်ကွက်မှာနေထိုင်တဲ့ ဒေသခံတစ်ဦးက “အရင်ကတော့ နယ်စပ်တံတားနားရယ်၊ လမ်းဆုံလမ်းဘေးတွေမှာ ကားလေးတွေရပ်တော့ လမ်းသွားရတာတအားရှုပ်တယ်။ အခုတော့ အရင်လို ကားတွေက လမ်းပိတ်တာတွေ လျော့သွားမယ်ထင်တယ်။ ပြီးတော့ ကားလေးဝင်းက မြို့အဝင်မှာဆိုတော့ ဒေသခံတွေအတွက် သုံးဘီးနဲ့ကားလေးတွေ ကယ်ရီဆွဲပြီး ဝင်ရှာလို့ရသွားမယ်။ ပြီးတော့ ကားကြီးဝင်းလည်း ရှိမယ်ဆိုရင် ပြည်သူတွေလမ်းသွားရတာ အဆင်ပြေသွားမယ်”လို့ပြောပါတယ်။
