မတ် ၂၊ ၂၀၂၆
Zalen
စစ်ကိုင်းတိုင်း၊ ကလေးမြို့ အကျဉ်းထောင်ကနေ စစ်ကောင်စီရဲ့ လွတ်ငြိမ်းချမ်းသာခွင့်ထဲမှာ နိုင်ငံရေးအကျဉ်းသား ၁၂ ဦးပါ၀င်လာတယ်လို့ သိရပါတယ်။
ပြန်လွတ်လာသူတွေဟာ အမျိုးသမီးနိုင်ငံရေးအကျဉ်းသူ လေးဦးနဲ့ အမျိုးသား ရှစ်ဦး စုစုပေါင်း ၁၂ ဦးကို ပြန်လွတ်ပေးခဲ့တာလို့ အကျဉ်းထောင်နဲ့ နီးစပ်သူတွေက ပြောပါတယ်။
” ဒီနေ့ ကလေးမော်လိုက်အကျဉ်းထောင်ကနေ နိုင်ကျဉ်း ၁၂ ဦးပါတယ်၊ ကျား ရှစ်ဦး၊ မ လေးဦးပေါ့နော်။ ၅၀(ည)နဲ့ ၅၂(က)တွေ ပြန်လွတ်လာတာ။ ဘယ်လောက်ပါပါ ပြန်လွတ်လာသူတွေအတွက် ၀မ်းသာရပါတယ်။ ” လို့ အကျဉ်းထောင်နဲ့ နီးစပ်သူတစ်ဦးက ပြောပါတယ်။
မတ်လ ၂ ရက်နေ့မှာ စစ်ကောင်စီက နိုင်ငံတ၀န်းက အကျဥ်းထောင်တွေကနေ အကြမ်းဖက်တိုက်ဖျက်ရေးပုဒ်မ ၅၀ (ည)၊ ၅၂ (က) တို့နဲ့ ပြစ်ဒဏ်ကျခံနေရတဲ့ အကျဉ်းသား ၇၃၃၇ ဦးကို လွတ်ငြိမ်းသက်သာခွင့် ပြီး ၁၂၄၈၇ ဦး အမှုရုပ်သိမ်းခဲ့ပါတယ်။
နိုင်ငံရေးအကျဥ်းသား ၃၂၄ ဦး လွတ်မြောက်လာတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဥ်းသားများ ကွန်ရက် (PPNM) က ဒီနေ့မှာ ထုတ်ပြန်ထားပါတယ်။
ပေါင်းတည်အကျဉ်းထောင်က နိုင်ငံရေးအကျဉ်းသား ကိုးဦး၊ သာယာဝတီအကျဉ်းထောင်က ၃၁ ဦး ၊ ဒိုက်ဦးထောင်က ၂၆ ဦး ၊ မအူပင်ထောင်က ၄၆ ဦး၊ ကော့သောင်းထောင်က ခြောက်ဦး၊ ပခုက္ကူထောင်က ၈၀ ဦး၊ ကလေးထောင်က ၁၂ဦး၊ ပြည်အကျဉ်းထောင် က ၂၄ဦး၊ သထုံထောင်က ၆၁ဦး နဲ့ မြိတ်ထောင် ၂၉ဦး တို့ လွတ်မြောက်လာခဲ့တာပါ။
သတင်း – Helen
ဓာတ်ပုံ-လူမှုကွန်ယက်
#ကလေးမြို့#အကျဉ်းထောင်#လွတ်မြောက်#Zalen
