မီဇိုရမ်ပြည်နယ်ထဲက စစ်ဘေးရှောင်များကို တစ်စုတစ်စည်းတည်းထားရှိဖို့ ပြည်နယ်အစိုးရ စီစဉ်နေ

၂၇၊ နိုဝင်ဘာလ၊ ၂၀၂၄

Zalen

အိန္ဒိယနိုင်ငံ၊ မီဇိုရမ်ပြည်နယ်ထဲကို ဝင်ရောက်ခိုလှုံနေကြတဲ့ မြန်မာနိုင်ငံ၊ ဘင်္ဂလားဒေ့ရှ့် နိုင်ငံ နဲ့ မဏိပူရ်ပြည်နယ် က စစ်ဘေးရှောင်များ တစ်စုတစ်စည်းတည်းနေထိုင်ဖို့အတွက် မီဇိုရမ်ပြည်နယ်အစိုးရက စီစဉ်နေတယ် လို့ မီဇိုရမ်အခြေစိုက် LPS Vision သတင်းဌာနက မနေ့နိုဝင်ဘာလ ၂၆ ရက်မှာဖော်ပြထားပါတယ်။

စစ်ဘေးရှောင်များ တစ်စုတစ်စည်းတည်း ထားရှိဖို့ကိစ္စနဲ့ ပတ်သက်လို့ မီဇိုရမ်ပြည်နယ်၊ ပြန်ထဲရေးဝန်ကြီး လည်းဖြစ် ဌာနေပြည်တွင်းရွေ့ပြောင်းနေထိုင်သူများဆိုင်ရာ အဆင့်မြင့်ကော် မတီ ( High Level Committee on Indigenous Internal Displaced Persons) ဥက္ကဋ္ဌ လည်းဖြစ်သူ ပူးကေ ဆပ်ဒါန်းနာ ( Pu K. Sapdanga) က ပြောကြားခြင်းဖြစ်တယ်လို့ LPS ကဖော်ပြပါတယ်။

မီဇိုရမ်ပြည်နယ်အစိုးရ၊ ပြည်ထဲရေးဝန်ကြီးဌာနရဲ့စာရင်းအရ လက်ရှိမီဇိုရမ်ပြည်နယ်အတွင်း မဏိပူရ်ပြည်နယ် ကနေ စစ်ဘေးရှောင်လာသူ ၈၀၁၀ ဦးရှိနေပြီး သူတို့ကို အာသံပြည်နယ် နဲ့ မီဇိုရမ်ပြည်နယ် နယ်စပ်တစ်နေရာမှာ နေရာချပေးဖို့ စီစဉ်နေတယ်လို့ သိရပါတယ်။

ဘင်္ဂလားဒေ့ရှ်နိုင်ငံကနေ စစ်ဘေးရှောင်လာသူများကို CADC နယ်မြေထဲမှာ နေရာချထားဖို့ စီစဉ်လျက်ရှိပြီး လက်ရှိ မီဇိုရမ်ပြည်နယ်မှာ ခိုလှုံနေတဲ့ ဘင်္ဂလားဒေ့ရှ့်က ဇို ( ချင်း ) မျိုးနွယ်စုစစ်ဘေးရှောင် ၂၀၁၄ ဦးရှိတယ်လို့ သိရပါတယ်။

အလားတူ မြန်မာနိုင်ငံကနေ မီဇိုရမ်ပြည်နယ် ခရိုင်အသီးသီးမှာ ဝင်ရောက်ခိုလှုံသူများအတွက် အိန္ဒိယ – မြန်မာ နယ်စပ် တစ်နေရာမှာ တစ်စုတစ်စည်းထဲ ထားရှိဖို့စီစဉ်နေကြောင်း ပြည်ထဲရေးဝန်ကြီးက ဆိုပါတယ်။ မီဇိုရမ်ပြည်နယ်မှာ မြန်မာစစ်ဘေးရှောင် က အများဆုံးဖြစ်ပြီး ၃၃၇၆၄ ဦးရှိတယ်လို့သိရပါတယ်။

ယခုလို စစ်ဘေးရှောင်များကို တစ်စုတစ်စည်းတည်းထားရှိဖို့စီစဉ်ထားခြင်းဟာ သူတို့ကိုမီဇိုရမ်ပြည်နယ်အတွင်း တစ်သက်လုံးနေခိုင်းတာမဟုတ်ဘဲ သူတို့တိုင်းပြည် မငြိမ်သက်ခင်အထိကာလအတွင်း အလှူရှင်များပေးအပ်တဲ့ အရာတွေကိုသာအားမကိုးပဲ မိမိဘာသာ ရှာဖွေ စားသောက်နိုင်ဖို့နဲ့ လုပ်ငန်းများရှာဖွေလုပ်ကိုင်နိုင်ကြရန် ရည်ရွယ်ထားခြင်းဖြစ်တယ်လို့ ပြည်ထဲရေးဝန်ကြီးက ပြောဆိုကြောင်း LPS သတင်းကဖော်ပြထားပါတယ်။

သတင်း -Grace