မတ် ၉၊ ၂၀၂၆
Zalen

ချင်းပြည်နယ်၊ ဖလမ်းမြို့နယ်၊ Tuphei ကျေးရွာမှာအကြမ်းဖက်စစ်တပ်ရဲ့သတ်ဖြတ်ခြင်းခံရတယ်လို့ ယူဆ ရတဲ့ အမျိုးသားရုပ်အလောင်းတလောင်းကို ယမန်နေ့ မတ်လ ၈ ရက်နေ့မှာဒေသခံများကတွေ့ရှိခဲ့တယ်လို့ သိရပါတယ်။

အဆိုပါအလောင်း ကို ယမန်နေ့ မတ်လ ၈ ရက်၊ မွန်းလွဲပိုင်း ၁ နာရီခွဲဝန်းကျင်မှာ ဒေသခံများကတွေ့ရှိခဲ့ခြင်းဖြစ်ပြီး မီးရှို့ပေးခဲ့ကြတယ်လို့သိရပါတယ်။

စစ်ကောင်စီတပ်ဖွဲ့ဝင်များဟာ အဆိုပါအမျိုးသားကိုသတ်ဖြတ်ပြီးနောက် Tuphei ရွာက ဦး ဗန်ရိုလျန်ရဲ့နေအိမ် ရှေ့မှာ မြေမြှုပ်ခဲ့ကြတာလို့သိရပါတယ်။

ဒီကိစ္စနဲ့ပတ်သက်လို့ ဒေသခံများက “ အခြားနေရာမှာသတ်ဖြတ်ပြီးတော့ ဒီမှာလာမြှုပ်တာလား၊ အဲ့နေရာမှာဘဲ သတ်တာလားဆိုတာလည်းမသိရဘူး။သေဆုံးသွားတာကြာပြီဖြစ်လို့ မည်သူမည်ဝါမှန်းမသိနိုင်တော့ဘူး။ ကျွန်တော်တို့ပြည်သူတွေထဲမှာတော့ပျောက်ဆုံးတဲ့လူမရှိဘူး။ တော်လှန်ရေးတပ်ဖွဲ့ဝင်လည်းဖြစ်နိုင်တယ်၊ဒါမှ မဟုတ် သူတို့တပ်ဖွဲ့ဝင်လည်းဖြစ်နိုင်တယ်။” လို့ ပြောပါတယ်။

တဖက်မှာလည်း အကြမ်းဖက်စစ်တပ်က ဖလမ်းမြို့နယ်ထဲကို ထိုးစစ်ဆင်လာတဲ့ ၄လ ကျော်ကြာကာလအတွင်း ဖလမ်းမြို့နယ်အတွင်း ပြည်သူများရဲ့နေအိမ်များအပြင် ဘုရားကျောင်း များကိုပါ မီးရှို့ဖျက်ဆီးနေပြီး ဘာသာရေး ဆရာများကို ကဲ့ရဲ့စော်ကားခြင်း များပြုလုပ်နေကာ Bishop အိပ်ယာပေါ်မစင်စွန့်တာတွေအထိ လုပ်ခဲ့ကြတယ် လို့သိရပါတယ်။

အကြမ်းဖက်စစ်တပ်က ဖလမ်းမြို့နယ်၊ Farso ကျေးရွာ ၊ Thuphei ကျေးရွာ၊ Lunghawh ကျေးရွာ နဲ့ Hlanzawl ကျေးရွာ စတဲ့ကျေးရွာများထဲကို ဝင်ရောက်ပြီး ပြည်သူ့နေအိမ်များကို မီးရှို့ဖျက်ဆီးနေတာကြောင့် ဒေသခံ ၂,၂၅၀ ကျော်ဟာ စစ်ရှောင်နေရပြီး အကူအညီများလည်းလိုအပ်နေကြတယ်လို့သိရပါတယ်။

သတင်း – Mickey

#ဖလမ်းမြို့#Tupheiကျေးရွာ#အမျိုးသားရုပ်အလောင်း#စစ်ကောင်စီ#Zalen