အောက်တိုဘာ ၃၀၊ ၂၀၂၅
Zalen
ချင်းပြည်နယ်၊ တီးတိန်မြို့နယ်၊ မွှာလ်ပီးရွာမှာ အောက်တိုဘာ ၂၉ ရက်နေ့မှာ စစ်ကောင်စီတပ်နဲ့ CDF CDM Siyin တပ်တို့ တိုက်ပွဲဖြစ်ပွားခဲ့တယ်လို့ သိရပါတယ်။
တိုက်ပွဲအတွင်းမှာ ချင်းတော်လှန်ရေးတပ်ဘက်က တစ်ဦး ကျဆုံးခဲ့ပြီး လက်ရှိမှာ နှစ်ဖက်စစ်ရေးအခြေအနေတင်းမာနေဆဲဖြစ်တယ်လို့ ဒေသခံတွေက ပြောပါတယ်။
” ကလေးကတက်လာတဲ့ စစ်ကြောင်းနဲ့ မနေ့က တိုက်ပွဲဖြစ်တယ်။ ရဲဘော်တစ်ယောက်ကျတယ်။ ဒီနေ့တော့ တိုက်ပွဲမရှိပေမယ့် အခြေအနေကတော့ တင်းမာနေတဲ့ အနေအထားပေါ့။ ” လို့ စစ်ရေးသတင်းအရင်းမြစ်တစ်ဦးက ပြောပါတယ်။
တီးတိန်မြို့ပေါ်က တပ်ကုန်းကို စစ်ကောင်စီတပ်က အောက်တိုဘာ ၂၆ ရက်ကစပြီး ၂၉ ရက်အထိ တပ် အင်အား၊ လက်နက်ခဲယမ်းအများအပြား ဖြည့်တင်းနေတယ်လို့ သိရပါတယ်။
လက်ရှိ တီးတိန်မြို့ပေါ်ကနေ စစ်ကောင်စီတပ်တွေဟာ တီးတိန်- သိုင်းငင်း – တီးတိန်လမ်းအတိုင်း စစ်ကြောင်းထိုးလာပြီး ဆဲဇန်ရွာကို ရောက်ရှိနေပြီလို့ သိရပါတယ်။
အောက်တိုဘာ ၂၈ ရက် နေ့ ည ၁၁နာရီ ၀န်းကျင်မှာ တီးတိန်မြို့နယ်၊ သိုင်းငင်းရွာကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသမီးတစ်ဦး ထိခိုက်ဒဏ်ရာရခဲ့ပြီး နေအိမ်တစ်လုံး ပျက်စီးထိခိုက်ခဲ့ပါတယ်။
စစ်ကောင်စီက အင်အားအလုံးအရင်းနဲ့ စစ်ကြောင်းထိုးလာတာကြောင့် ပြည်သူတွေ အသုံးပြုတဲ့ တောလမ်းတွေကိုလည်း လုံခြုံရေးအရ ခေတ္တပိတ်ထားမယ်လို့ CDF CDM Siyin က အောက်တိုဘာ ၂၇ က ထုတ်ပြန်ထားပါတယ်။
Mary
Photo: CDF CDM Siyin
