နို၀င်ဘာ ၅၊ ၂၀၂၅
Zalen
အမေရိကန်ပြည်ထောင်စု၊ ကန်တက်ကီပြည်နယ်၊ လူဝီဗီးမြို့ (Louisville) နိုင်ငံတကာလေဆိပ်မှာ လောင်စာဆီ သယ်ဆောင်လာတဲ့ ကုန်တင်လေယာဉ် တစ်စင်းပျက်ျက်မှုကြောင့် လူ ခုနှစ်ဦးထက်မနည်း သေဆုံးခဲ့ပါတယ်။
အမေရိကန် ဒေသစံတော်ချိန် အင်္ဂါနေ့ ညနေ ၅ နာရီ ၁၅ မိနစ်မှာ ပျက်ကျခဲ့တာဖြစ်ပြီး မီးလောင်ကျွမ်းနေသလို အနီးနားက စီးပွားရေးလုပ်ငန်းတွေလည်း မီးကူးကုန်တယ်လို့ အမေရိကန်မြို့ပြလေကြောင်း အာဏာပိုင်အဖွဲ့က ပြောပါတယ်။
လေယာဉ်ခရီးစဉ်အမှတ် Flight 2976 ဟာ ဟာဝိုင်အီကို ဦးတည်ပျံသန်းမှာဖြစ်ပြီး ၁၇၅ ပေခန့် အမြင့် ရောက်ချိန် ပျံသန်းစဉ်မှာပဲ ပျက်ကျခဲ့တာပါ။
လက်ရှိ လေယာဉ်ပျက်ကျမှုမှာ သေဆုံးသူ ခုနှစ် ဦးအပြင် သေဆုံးသူ အရေအတွက် တိုးလာနိုင်တယ်လို့လည်း ဆိုပါတယ်။
ဒါအပြင် လူ ၁၁ ဦး ထိခိုက်ဒဏ်ရာတွေကြောင့် ဆေးရုံတင်ထားရပြီး ပျောက်ဆုံးနေသူတွေလည်းရှိနေပါတယ်။
လေယာဉ်ဟာ မီးလောင် ပေါက်ကွဲနေချိန်မှာ လောင်စာဆီ ဂါလံ သုံးသောင်းရှစ်ထောင်ကျော်ကို တင်ဆောင်ထားတယ်လို့ သိရပါတယ်။
လူဝီဗီးမြို့ဟာ အကြီးဆုံး ကမ္ဘာ့သယ်ယူပို့ဆောင်ရေးလေဆိပ်ဖြစ်ပြီး ဒီလိုဖြစ်စဉ်ကြောင့် Amazon, USPS အပါအဝင် ကုန်ပို့စနစ်တွေ တချို့ ရပ်တန့်နိုင်တယ်လို့ သိရပါတယ်။
ကိုးကား – Reuters
Helen
