၁၅၊ ဇွန်လ၊ ၂၀၂၄
Zalen
ချင်းပြည်နယ်၊ တွန်းဇံမြို့မှာ ကာလတန်ဖိုး အိန္ဒိယ ရူပီသိန်း ၃၅၀ မှ ၄၀၀ ကြား ဘိန်းဖြူ ဖမ်းဆီးရမိတယ်လို့ ချင်းအမျိုးသားတပ်ဦး(CNF) ပြန်ကြားရေးအဖွဲ့က ဒီနေ့ ဇွန်လ ၁၅ ရက်နေ့မှာ သတင်းထုတ်ပြန်ထားပါတယ်။
တွန်းဇံမြို့မှာ ဇွန်လ ၁၃ ရက်နေ့က ချင်းအမျိုးသားတပ်မတော်(CNA)နဲ့ ပူးပေါင်းအဖွဲ့တို့ လုံခြုံရေး စစ်ဆေးရေးဂိတ်မှာ အရပ်သား ၂ ဦးထံမှ ဆပ်ပြာဗူးပေါင်း (၁၀၀၀)ဖြင့် ထုတ်ထားတဲ့ ဘိန်းဖြူ ဖမ်းဆီးရမိခဲ့တာဖြစ်တယ်လို့ သိရပါတယ်။
အဲ့ဒီ ဘိန်းဖြူတွေဟာ အိန္ဒိယနိုင်ငံသို့ ပို့ဆောင်မယ့် ဘိန်းဖြူတွေဖြစ်ပြီး ဇွန်လ ၁၃ရက် ညနေပိုင်းက ယာဉ်အမှတ် YGN/4J-4438 ပေါ်မှာ ဖမ်းဆီးရမိတာလို့ သိရပါတယ်။
ဖမ်းဆီးရတဲ့ အရပ်သား နှစ်ဦးနဲ့ သူတို့ အသုံးပြုတဲ့ မော်တော်ယာဉ်ကို မူးယစ်ဆေးဝါးဆိုင်ရာ လုပ်ထုံးလုပ်နည်းနဲ့အညီ အရေးယူဆောင်ရွက်နိုင်ရေးအတွက် ယာယီထိန်းသိမ်းထားပြီး သူတို့ရဲ့ ကိုယ်ရေးအချက်လက်တွေနဲ့တကွ ကွင်းဆက်တွေကို ဆက်လက်စုံစမ်းဖော်ထုတ်သွားမယ်လို့လည်း ဆိုပါတယ်။
ချင်းပြည်နယ်မှာ တွန်းဇံမြို့နယ်ဟာ ဘိန်းစိုက်ပျိုးမှု အများဆုံးဒေသလို့ သိရပါတယ်။
သတင်း – အိုက်လင်း
