၁၇၊ အောက်တိုဘာ၊ ၂၀၂၄
Zalen
စစ်ကောင်စီရဲ့ သန်းခေါင်စာရင်းကောက်ယူမှုကို အောက်တိုဘာ ၁ ရက်မှ ၁၅ ရက်ထိ ကောက်ယူခဲ့ရာမှ အောက်တိုဘာ ၃၁ ရက်ထိ ရက်တိုးကောက်ယူသွားမယ်လို့ စစ်ကောင်စီက အောက်တိုဘာ ၁၆ ရက် နေ့က ကြေညာထားပါတယ်။
အကြောင်းအမျိုးမျိုးကြောင့် သန်းခေါင်စာရင်း ကောက်ယူမခံရသေးသူတွေကို ပြန်လည်ကောက်ခံဖို့အတွက် အခုလို ရက်ထပ်တိုးလိုက်တာလို့ ဆိုပါတယ်။
၂၀၂၄ နှစ် သန်းခေါင်စာရင်းကောက်ယူမှုကို စစ်ကောင်စီက လုံခြုံရေးအပြည့်နဲ့ ရပ်ကွက်၊ ကျေးရွာတွေက နေအိမ်ကို တအိမ်တက်ဆင်း ကောက်ယူခဲ့ခြင်းဖြစ်ပြီး နိုင်ငံတစ်ဝန်း သန်းခေါင်စာရင်းကောက်ယူမှုကို စာရင်းစစ်၊ စာရင်းကောက် စုစုပေါင်း ၄၂,၀၀၀ ခန့်နဲ့ ကောက်ယူခဲ့တယ်လို့ စစ်ကောင်စီက ထုတ်ပြန်ထားပါတယ်။
သန်းခေါင်စာရင်းကောက်ယူနေချိန် တချို့ဒေသတွေမှာ စစ်ကောင်စီ လက်အောက်ခံ သန်းခေါင်စာရင်းကောက်ယူသူတွေဟာ တော်လှန်ရေးတပ်ဖွဲ့တွေရဲ့ တိုက်ခိုက်တာ၊ သတ်ဖြတ်တာ ခံရတာတွေရှိခဲ့ပါတယ်။
ဒါကြောင့် တချို့နေရာတွေမှာ သန်းခေါင်စာရင်းကို ကောက်ခံနိုင်ခြင်းမရှိသေးပေ။ ချင်းပြည်နယ်မှာတော့ ဟားခါးမြို့၊ ဖလမ်းမြို့နဲ့ တီးတိန်မြို့က ရပ်ကွက် တချို့မှာသာ သန်းခေါင်စာရင်း ကောက်ခံနိုင်ခဲ့ပါတယ်။
နေညို
