ဖေဖော်ဝါရီလ ၆ရက်၊ ၂၀၂၅
Zalen
မကွေးတိုင်း၊ ငဖဲမြို့နယ် တောင်ပေါ်ကျေးရွာတွေက ချင်းလူငယ်တွေဟာ စစ်ကောင်စီတပ်ရဲ့ တပ်သားသစ်အဖြစ် စုဆောင်းခံနေရမှာကို စိုးရိမ်နေရတယ်လို့ ဒေသခံတွေက သိရပါတယ်။
အဲ့ဒါကြောင့် တောင်ပေါ်ကျေးရွာတွေက ချင်းလူငယ်တွေဟာ ငဖဲ၊ ပဒါန်း စတဲ့မြို့ပေါ်မှာ စျေးသွားဝယ်တာ၊ ခရီးသွားတာ၊ အလုပ်သွားလုပ်တာတွေ မပြုလုပ်ရဲတော့ဘူးလို့ သိရပါတယ်။
“ငဖဲမြို့မှာလည်း လူငယ်တွေ ပေါ်ဆွဲတာ၊ တပ်သားသစ် စုဆောင်းတာတွေလုပ်လာတယ်။ ဒါကြောင်း လူငယ်တွေအတော်များ မြို့ထဲမဆင်းရဲတော့ဘူး။ အရင်ကတော့ ပဒါန်းနဲ့ကယ်ရီဆွဲတယ်။ ပန်းရံလုပ်တယ်။ စျေးထွက်ဝယ်တယ်။ အခုတော့ ရွာမှာပဲနေဖြစ်တော့တယ်။”လို့ ဂုတ်ကြီးကျေးရွာက ချင်းလူငယ်တစ်ဦးက ပြောပါတယ်။
ငဖဲမြို့နယ်၊ တောင်ပေါ်ကျေးရွာတွေက ဒေသခံတွေဟာ စျေးကို ငဖဲ နဲ့ ပဒါန်းမြို့မှာ လူတွေက ကား၊ ဆိုင်ကယ်နဲ့ သွားရောက်ပြီး ဝယ်ယူနေကြတာဖြစ်ပါတယ်။
အခုခါ စစ်ကောင်စီတပ်ရဲ့ တပ်သားသစ်အဖြစ် လူငယ်တွေဖမ်းဆီးမှုရှိတာကြောင့် လူငယ်တွေကို မြို့ထဲမသွားခိုင်းတောဘဲ မိဘတွေက စျေးသွားဝယ်ယူတာတွေ ပြုလုပ်နေရတယ်လို့ သိရပါတယ်။
“အရင်ကတော့ သားသမီးတွေ မြို့ထဲစျေးသွားဝယ်ခိုင်းလို့ရတယ်။ ကိုယ်ကအလုပ်မပျက်တော့ဘူးပေါ့။ တစ်ခုခုဆိုလည်း ကလေးတွေသွားခိုင်းလို့ရတယ်။ အခုတော့ သူတို့စိတ်မချဘူး။ ကိုယ်တိုင်းသွားရတယ်။” လို့ စပ်စီကျေးရွာက ချင်းအမျိုးသားတစ်ဦးက ပြောပါတယ်။
ငဖဲမြို့နယ် အမ်း – ပဒါန်း ကားလမ်းပေါ်မှာ စစ်ကောင်စီတပ်နဲ့ တော်လှန်ရေးတပ်ဖွဲ့တို့ မကြာခဏ တိုက်ပွဲဖြစ်ပွားပြီး စစ်ကောင်စီတပ်ဟာ ငဖဲမြို့နယ်က စစ်ကောင်စီစစ်ဆေးရေးဂိတ်တွေမှာ လုံခြုံရေးတင်းကျပ်ထားတယ်လို့ သိရပါတယ်။
သတင်း – ခူမီး
