ဖေဖော်ဝါရီ ၁၇ရက် ၂၀၂၅
Zalen
ဖေဖော်ဝါရီ (၁၂) ရက်နေ့က စစ်ကောင်စီတပ်များထောင်ထားတဲ့ မိုင်းနင်းမိလို့ ဒါဏ်ရာ အပြင်းအထန်ရရှိခဲ့တဲ့ တမူးမြို့နယ်၊ မင်းသာကျေးရွာနေ ကိုထွန်းထွန်း အသက် (၅၀)ခန့်ဟာ ဆေးရုံတစ်ခုမှာ ဆေးဝါးကုသရင်း ယနေ့ မနက် ၄နာရီခန့်မှာ သေဆုံးသွားပြီလို့ သိရပါတယ်။
အဆိုပါကိုထွန်းထွန်းဟာ ညာဘက်ခြေဖမိုးပြတ်ထွက်ဒါဏ်ရာ၊ ဘယ်ခြေသလုံးကျိုးဒါဏ်ရာနဲ့ လက်မှာ မိုင်းစထိမှန်ဒါဏ်ရာတို့ ရရှိခဲ့တာဖြစ်ပြီး ခြေထောက်နှစ်ဖက်လုံး ခွဲစိတ်ဖြတ်ထုတ်မှာဖြစ်လို့ ခွဲစိတ်မှုခံယူပြီးနောက် ၃နာရီခန့်အကြာမှာ အသက်ရှူကြပ်ပြီး သေဆုံးသွားတာလို့ ၎င်းနဲ့နီးစပ်သူက ပြောပါတယ်။
“ကိုထွန်းထွန်းဒါဏ်ရာကပြင်းတော့ ခြေထောက်နှစ်ဖက်လုံးဖြတ်ပစ်ရတာ။ သူက နှကိုယ်က အဆုတ်ရောဂါနဲ့ ကျောက်ကပ် ရောဂါအခံရှိတော့ခက်တယ်။ ရောဂါအခံကိုကုနေရင် ခြေထောက် ဒါဏ်ရာအနာက ပုပ်တော့မှာဆိုတော့ ခြေထောက်ပဲဦးစားပေးရတာ။ ရောဂါအခံရှိတော့ မခံနိုင်လို့သေဆုံးသွားတာလို့” လို့ ၎င်းနဲ့နီးစပ်သူတစ်ဦးက Zalen ကိုပြောပါတယ်။
စစ်ကိုင်းတိုင်း၊ တမူးမြို့နယ်မှာ ယခုနှစ် ဇန်နဝါရီလမှ ယခုလဖေဖော်ဝါရီလ ၁၂ရက်နေ့ထိ မြေမြုပ်မိုင်းနင်းမိလို့ ထိခိုက်ဒါဏ်ရာရရှိတဲ့ အရပ်သား ၆ဦးထိ ရှိနေပြီး တစ်ဦးသေဆုံးသွားတယ်လို့ သိရပါတယ်။
သတင်း – တမူးနွေဦး
