ဒီဇင်ဘာ ၁၊ ၂၀၂၅
Zalen
အင်တာနက်နည်းပညာ သမိုင်းမှာ မှတ်တမ်းတင်လောက်တဲ့ တိုးတက်မှုတစ်ခုအနေနဲ့ တရုတ်နိုင်ငံဟာ ကမ္ဘာ့ပထမဆုံးသော 10-Gigabit (10G) broadband ကွန်ရက်ကို စီးပွားဖြစ် စတင်အသုံးပြုနေပြီလို့ ကြေညာလိုက်ပါတယ်။
ထိုမြန်နှုန်းမြင့် ကွန်ရက်ဟာ သုံးစွဲသူတွေကို 4K ရုပ်ရှင်တစ်ခုကို စက္ကန့် ၂၀ အောက်နဲ့ ဒေါင်းလုဒ်လုပ်နိုင်တဲ့ စွမ်းဆောင်ရည်ကို ပေးစွမ်းမှာဖြစ်ပါတယ်။
ဟေဘေး (Hebei) ပြည်နယ်၊ ရှုံးအန်း (Xiong’an) မြို့သစ်ဧရိယာမှာ စတင်အသုံးပြုခဲ့တဲ့ ထိုကွန်ရက်ကို နည်းပညာကုမ္ပဏီကြီး Huawei နဲ့ နိုင်ငံပိုင် ဆက်သွယ်ရေး အော်ပရေတာ China Unicom တို့က ပူးပေါင်းတည်ဆောက်ခဲ့တာပါ။
လက်တွေ့စမ်းသပ်မှုများအရ ဒေါင်းလုဒ်မြန်နှုန်းဟာ 9,834 Mbps (10 Gbps နီးပါး) အထိ ရောက်ရှိခဲ့ပြီး အပ်လုဒ်မြန်နှုန်းဟာလည်း 1,008 Mbps ခန့်ရှိခဲ့ပါတယ်။
၎င်းဟာ လက်ရှိ အိမ်သုံး အင်တာနက် မြန်နှုန်းများထက် ဆယ်ဆအထိ ပိုမိုမြန်ဆန်ပါတယ်။
ထိုအောင်မြင်မှုကို လက်ရှိ ဖိုက်ဘာ-အော့ပတစ် (fiber-optic) အခြေခံအဆောက်အအုံပေါ်မှာ 50G Passive Optical Network (PON) ဟူသော နောက်ဆုံးပေါ် နည်းပညာကို အသုံးပြု၍ တပ်ဆင်ခြင်းဖြင့် အကောင်အထည်ဖော်ခဲ့တာ ဖြစ်ပါတယ်။
ဒါ့အပြင် ကွန်ရက်ရဲ့ နှောင့်နှေးချိန် (Latency) မှာလည်း ၃ မီလီစက္ကန့် (3ms) သာရှိသဖြင့် အင်တာနက် အသုံးပြုမှုမှာ နှောင့်နှေးမှု လုံးဝနီးပါး မရှိနိုင်တော့ပါဘူး။
10G ကွန်ရက်ဟာ သာမန် အင်တာနက် အသုံးပြုမှု မြန်နှုန်းကို တိုးမြှင့်ပေးရုံသာမက အနာဂတ် နည်းပညာများစွာအတွက် အခြေခံအုတ်မြစ်တစ်ခုလည်း ဖြစ်လာမည်ဖြစ်ပါတယ်။
“ဤသည်မှာ Cloud Computing၊ 8K ဗီဒီယို ကြည့်ရှုခြင်းနဲ့ VR/AR အတွေ့အကြုံများအတွက် တံခါးဖွင့်ပေးလိုက်ခြင်းဖြစ်ပါတယ်။ စက်မှုလုပ်ငန်း အလိုအလျောက်စနစ်များနဲ့ စမတ်မြို့တော်တွေ ဖွံ့ဖြိုးတိုးတက်ရေးကိုလည်း သိသိသာသာ အထောက်အကူပြုပါလိမ့်မည်” လို့ China Unicom မှ တာဝန်ရှိသူတစ်ဦးက ပြောကြားခဲ့ပါတယ်။
တရုတ်နိုင်ငံရဲ့ ထိုခြေလှမ်းဟာ ကမ္ဘာလုံးဆိုင်ရာ broadband ပြိုင်ပွဲမှာ ဦးဆောင်သူအဖြစ် ရပ်တည်စေခဲ့ပြီး အင်တာနက် အခြေခံအဆောက်အအုံ မြှင့်တင်ရေးအတွက် စံနှုန်းအသစ်တစ်ခုကို သတ်မှတ်လိုက်ပြီ ဖြစ်ပါတယ်။
သတင်း-ဆလိုင်း
ကိုးကား- Tech News Outlets
