ဧပြီ ၂၉ ၊၂၀၂၆
Zalen
ကန်ပက်လက်မြို့နယ် ၊ ကျင်ဒွေးမြို့အနီးရှိ မုန်းချောင်းတံတားကို ဒီကနေ့ မနက် ၁၀ နာရီခွဲ ၀န်းကျင်မှာ စစ်ကောင်စီက ဗုံးကြဲလို့ တံတားပြုပြင်သူတွေနဲ့ တံတားအနီးအနားရှိ အရပ်သားပြည်သူတွေ ဗုံးထိမှန်ပြီး သေဆုံး/ထိခိုက်မှုတွေ များတယ်လို့ ဒေသခံတွေထံကသတင်းရရှိပါတယ်။
အဆိုပါလေကြောင်းတိုက်ခိုက်မှုအတွင်း တံတားဦးတက် YAK 130 ဂျက်ဖိုက်တာ ၁ စီးနဲ့ အကြောင်းမဲ့ ဗုံးကြဲ တိုက်ခိုက်ခဲ့တာကြောင့် တံတား ပြုပြင်တဲ့အရပ်သား တွေနဲ့ အနီးအနားဈေး ရောင်းတဲ့ ပြည်သူတွေ ထိခိုက်သေဆုံးခဲ့တာလို့ဆိုပါတယ်။
” ၈ ဦးသေသွားတယ်လို့ပြောတယ်။ ဒဏ်ရာရတာက ၃ ဦးတဲ့။ အရပ်သားတွေပါ။တံတားပြင်ကြတာ။ ပြီးတော့ တံတားဘေးမှာ မုန့်ဟင်းခါး ရောင်းတဲ့သူတွေရောသေတာ” လို့ ဒေသခံတဦးက Zalen ကိုပြောပါတယ်။
ဆက်လက်ပြီး လေကြောင်းတိုက်ခိုက်မှုကြောင့်ပြန်ပြုပြင်ထားတဲ့ တံတားလည်းပျက်စီးသွားတယ်လို့ သူကရှင်းပြပါတယ်။
အဲ့ဒီမုန်းချောင်းတံတားကတော့ ကန်ပက်လက် ၊ပလက်၀ ၊ ရခိုင် ဘက်တွေ သွားလာနေရတဲ့ တံတားဖြစ်ပြီး အခုချိန်မှာတော့ ဒေသခံ တွေရဲ့ လမ်းပန်းဆက်သွယ်ရေး အခက်အခဲ ဖြစ်နေတယ်လို့ သိရပါတယ်။
သတင်း – မိုင်လှူးလှူး
ဓာတ်ပုံ – မုန်းချောင်းတံတားပုံ
