ဇွန် ၂၉၊၂၀၂၆
Zalen
ချင်းပြည်နယ်၊ ဟားခါးမြို့နယ်၊ ဇိုခွါဒေသ၊ မာလ်ဆောမ်ကျေးရွာကိုအကြမ်းဖက်စစ်တပ်က မနေ့ ဇွန်လ ၂၈ ရက် ညနေပိုင်းမှာလေကြောင်းကနေဗုံးကြဲတိုက်ခိုက်လို့လူနေအိမ်တစ်ချို့ပျက်စီးသွားတယ်လို့သိရပါတယ်။
အကြမ်းဖက်စစ်တပ်ရဲ့ တံတားဦးလေတပ်တက် ဂျက်ဖိုက်တာ တစ်စီးက မာလ်ဆောမ်ကျေးရွာကို ညနေ ၄ နာရီ ဝန်းကျင်မှလေကြောင်းတိုက်ခိုက်ခဲ့ခြင်းဖြစ်ပြီး အဆိုပါဗုံးကြဲတိုက်ခိုက်မှုကြောင့် လူနေအိမ်တစ်ချို့ပျက်စီးသွား ပေမယ့် ပြည်သူများထိခိုက်ဒဏ်ရာရရှိတာမရှိဘူးလို့သိရပါတယ်။
“ မာလ်ဆောမ်ဗုံးကြဲခံရတာကံကောင်းထောက်မစွာနဲ့လူအထိအခိုက်တော့မရှိဘူး။ နေအိမ်ပျက်စီးတာတော့ ဆယ်ဂဏန်းလောက်ရှိမယ်။ “ လို့ ဟားခါးမြို့ခံတစ်ဦးကပြောပါတယ်။
မာလ်ဆောမ်ကျေးရွာဟာ ဟားခါးမြို့ကနေ မိုင် ၃၀ ခန့်အကွာမှာတည်ရှိတာဖြစ်ပြီး အိမ်ထောင်စု ၆၀ ခန့် နေထို တဲ့ ကျေးရွာဖြစ်ပါတယ်။
အကြမ်းဖက်စစ်တပ်ဟာ ပြီးခဲ့တဲ့ ရက်ပိုင်းအတွင်း ချင်းပြည်တောင်ပိုင်း အပြင် မြောက်ပိုင်းကိုပါ လေကြောင်း တိုက်ခိုက်မှု ဆက်တိုက်ပြုလုပ်လျက်ရှိပါတယ်။
ပြီးခဲ့တဲ့ ဇွန်လ ၂၆ ရက် ညပိုင်းမှာလည်းအကြမ်းဖက်စစ်တပ်က ဟားခါးမြို့အနီးရှိ CDF-Hakha တပ်စခန်း နှစ်ခု ကို လေကြောင်းကနေဗုံးကြဲတိုက်ခိုက်ခဲ့တာကြောင့် CDF-Hakha တပ်ဖွဲ့ဝင် ၅ ဦး ကျဆုံးခဲ့ပါတယ်။
သတင်း – Mickey
