၈၊ မတ်၊ ၂၀၂၄
Zalen
ချင်းပြည်နယ်၊ တီးတိန်မြို့မှာ မတ်လ ၇ရက်နေ့ နေ့လည်ပိုင်းက စကောလမ်ရပ်ကွက်နဲ့ မြို့မရပ်ကွက်ကြားမှာ ဗုံးတစ်လုံးပေါက်ကွဲခဲ့တာကြောင့် အရပ်သားနှစ်ဦး ထိခိုက်ဒဏ်ရာရရှိခဲ့တယ်လို့ ဒေသခံတွေကပြောပါတယ်။
ထိခိုက်ဒဏ်ရာရရှိသူနှစ်ဦးဟာ အသက် သုံးနှစ်အရွယ် ကလေးငယ်တစ်ဦးနဲ့ မိခင်ဖြစ်သူတို့ဖြစ်ပြီး ရေချိုးနေစဉ် ဗုံးပေါက်ကွဲခဲ့တာကြောင့် ထိခိုက်ခဲ့တာလို့ ဒေသခံတွေက ဆိုပါတယ်။
” အဲဒီ စကောလမ်းနဲ့ မြို့မကြားမှာ ချောင်းရှိတဲ့ အဲဒီချောင်းက ဝါးရုံနားမှာပေါက်တာ။ အဲဒီချောင်းမှာ ရေချိုးနေတဲ့ သားအမိ ဗုံးစမှန်ပြီး အခု ဆေးရုံမှာပဲ၊ ဆေးကုနေရတုန်း။ အမေဖြစ်သူကတော့ ခေါင်းထိသွားတယ်။ ပြီးတော့ အဲဒီနားက နေအိမ်တချို့လည်း ပျက်စီးသွားတယ်။ ” လို့ ဒေသခံတစ်ဦးက Zalenကို ပြောပါတယ်။
အခုပေါက်ကွဲတဲ့ ဗုံးဟာ ဘယ်အဖွဲ့အစည်း ထောင်ထားတဲ့ ဗုံးဆိုတာ မသိရှိရသေးဘူးလို့ ဒေသခံတွေက ဆိုပါတယ်။
ဗုံးပေါက်ကွဲမှုဖြစ်ပြီးတဲ့နောက်မှာ စကောလမ်ရပ်ကွက်နဲ့ မြို့မရပ်ကွက်တွေမှာ စစ်ကောင်စီတပ်က နေအိမ်တွေကို စစ်ဆေးခဲ့သလို လမ်းသွားလမ်းလာ တွေကိုလည်း စစ်ဆေးရေး ပြုလုပ်ခဲ့တယ်လို့ ဒေသခံတွေက ပြောပါတယ်။
နွေဦးချယ်ရီ
