ကန်ပက်လက်မြို့နယ် ငကြဲကျေးရွာကနေ ဆောမြို့နယ် သီးကုန်းရွာမှာ ကျောင်းသွားတက်တဲ့ မူလတန်းအရွယ် ကလေး(၆)ဦးနဲ့ ကျောင်းလာကြိုသူအမျိုးသမီးတစ်ဦးဟာ ဇွန်လ(၇)ရက် ညနေလေးနာရီခန့်မှာ ချောင်းထဲမျောပါသွားကြပါတယ်။
ကလေး ခြောက်ယောက်ထဲက သုံးယောက်ကို အသက်ရှင်လျက် မနေ့ညကပြန်လည်တွေ့ရှိပေမယ့် ဦးလိန်းထုံ၊ ဒေါ်လိုင်းထန်းတို့ရဲ့သားသမီးသုံးယောက်ဖြစ်တဲ့ တတိယကျောင်းသား မောင်နိုင်းလိန်း(၉နှစ်)၊ ဒုတိယတန်းကျောင်းသား မောင်ထုံလိန်း(၈နှစ်)၊ KG ကျောင်းသူ မလှူးလိန်း(၅နှစ်)နဲ့ ကျောင်းလာကြိုသူ ဒေါ်လေးဟုန်း(၅၀နှစ်)တို့ပျောက်ဆုံးလျက်ရှိပါတယ်။
ဒီမနက် (၁၀)နာရီခွဲမှာ ဆောမြို့နယ် လယ်ရင်းကျေးရွာအနောက် ခြောက်ဖာလုံခန့်အကွာချောင်းစပ်မှာ တတိယကျောင်းသား မောင်နိုင်းလိန်း(၉နှစ်)အလောင်းကိုပြန်တွေ့ပြီဖြစ်ပါတယ်။
ငကြဲရွာမှာ ကျောင်းမရှိတာကြောင့် ၎င်းတို့ရွာနဲ့ နှစ်မိုင်ခန့်ဝေးတဲ့ သီးကုန်းရွာမှာကျောင်းတက်နေကြပါတယ်။
