ဇန်နဝါရီ ၂၂ ၊ ၂၀၂၆။
Zalen
အိန္ဒိယနိုင်ငံ၊ မီဇိုရမ်ပြည်နယ်အတွင်း ပြီးခဲ့တဲ့ ၂၀၂၅ ခုနှစ်၊ စက်တင်ဘာလ ၁ ရက်နေ့ကနေ ၂၀၂၆ ခုနှစ် ဇန်နဝါရီလ ၁၉ ရက်နေ့အထိ ၅ လတာ ကာလအတွင်း ရူပီး သန်းပေါင်း ၁၉၀ ကျော်တန်ဖိုးရှိတဲ့ မူးယစ်ဆေးများဖမ်းဆီးခဲ့ပြီလို့ သိရပါတယ်။
မီဇိုရမ်ပြည်နယ်အစိုးရ၊ ပြည်ထဲရေးဝန်ကြီး ဦးဆောင်မှုဖြင့် မူးယစ်ဆေးတိုက်ဖျက်ရေးကို Jericho စစ်ဆင်ရေး အမည်ဖြင့်ပြီးခဲ့တဲ့ ၂၀၂၅ ခုနှစ် စက်တင်ဘာလကနေ အရှိန်အဟုန်မြှင့်တင်ခဲ့တာ ဖြစ်ပါတယ်။
ဒီကာလအတွင်း ရူပီး ၁၉၆.၄၂ သန်း တန်ဖိုးရှိတဲ့ မူးယစ်ဆေးများ ဖမ်းဆီးခဲ့တာဖြစ်ပြီး မီဇိုရမ်ရဲတပ်ဖွဲ့က အမှုပေါင်း ၁၂၅ အမှုဖွင့်ခဲ့ပြီး လူပေါင်း ၁၈၅ ဦးဖမ်းဆီးခဲ့တယ်လို့ သိရပါတယ်။
မီဇိုရမ်ပြည်နယ်ထဲက မူးယစ်ဆေးဖမ်းဆီးမှုအများဆုံးခရိုင်မှာ ဆိုင်သွာလ်းခရိုင်ဖြစ်ပြီး ရူပီး ၈၅.၂၆ သန်းတန် ဖမ်းဆီးခဲ့ပါတယ်။ဖမ်းဆီးမှုအနည်းဆုံးခရိုင်မှာ ရှာဟာခရိုင်ဖြစ်ပြီး ရူပီး ၇၀၀၀၀ တန်ဖိုးသာဖမ်းမိထားပါတယ်။
တာဝန်ရှိသူများက ဖမ်းဆီးထားတဲ့ မူးယစ်ဆေးများမှာ ဘိန်းဖြူ ၃၃.၅၅၉ ကီလိုဂရမ်၊ မက်သမ်ဖက်တမင်း စိတ်ကြွဆေး ၂၀၅.၀၂၄ ကီလိုဂရမ်၊ ခရစ်တယ်လ် မက်တမ်ဖက်တမင်း ၁၃.၃၂၈ ကီလိုဂရမ်၊ အလ်ပရာဇိုလမ် အလုံးပေါင်း ၄၇၄၀၀၊ ဆေးခြောက် ၂၁.၁၀၈ ကီလိုဂရမ်၊ ကော်ရက်ချောင်းဆိုးပျောက်ဆေး များ နဲ့ ဘိန်းစေ့ များ ပါဝင်တယ်လို့သိရပါတယ်။
ယခုဖမ်းဆီးထားတဲ့ မူးယစ်ဆေးများနဲ့ တရားခံများအနက် မြန်မာနိုင်ငံသား အများအပြားပါဝင်ပေမယ့် မီဇိုရမ်ပြည်နယ် ရဲတပ်ဖွဲ့ရဲ့ထုတ်ပြန်ချက်ထဲမှာ အတိအကျဖော်ပြထားခြင်းမရှိပါ။
သတင်း – Mickey
ဓာတ်ပုံ-လူမှုကွန်ယက်
#အိန္ဒိယ#မီဇိုရမ်#မူးယစ်ဆေး#Zalen
